Азески, Заев и Бислимовски договориле акција за ублажување на последиците од енергетскиот ценовен шок

На средбата било договорено Стопанската комора на Северна Македонија да го сублимира мислењето на компаниите, Регулаторната комисија за енергетика во рамки на своите надлежности најенергично да ги санкционира сите снабдувачи кои неосновано, непрофесионално и бесправно ги откажуваат веќе склучените договори со компаниите и Владата , која мора да изнајде начин да им помогне на компаниите во рамките на можностите.

Вчера, 05.10., во Стопанската комора на Северна Македонија се одржала работна средба под раководство на претседателот на Комората Бранко Азески, со единствена точка на дневен ред – состојбата настаната со енормното покачување на цените на енергенсите на светските берзи.

На работната средба учествувале и премиерот Зоран Заев и претседателот на Регулаторна комисија за енергетика Марко Бислимоски.

„По опсежната дискусија и размена на мислења, јасно беше дека кризата е реалност и дека ќе потрае подолг период, и ќе бара решенија кои ќе имаат и долгорочен и кракорочен карактер. За таа цел, мора да се изврши мобилизација на сите учесници во овој процес, затоа што тоа е од круцијален каратер за егзистирање и развој на македонската економија. На сите тие чинители паѓа голема одговорност да ја менаџираат ситуацијата на највисоко професионално ниво и во согласност со веќе изграденото мислење на светските авторитети од оваа област дека времето на евтината енергија полека привршува и дека ќе мора сите да ја прифатиме новата реалност. “, велат од Комората.

На средбата било договорено Стопанската комора на Северна Македонија да го сублимира мислењето на компаниите, Регулаторната комисија за енергетика во рамки на своите надлежности најенергично да ги санкционира сите снабдувачи кои неосновано, непрофесионално и бесправно ги откажуваат веќе склучените договори со компаниите и Владата , која мора да изнајде начин да им помогне на компаниите во рамките на можностите.

Во таа насока, од Комората ја поздравуваат одлуката за интервентен увоз на јаглен за домашните електрани со кои ќе се подигне на максимално ниво домашното производство и се повикуваат компаниите да учествуваат на овој јавен повик, кој ќе овозможи нивна работа подолг период и поевтина електрична енергија и за нив и за домаќинствата.

 Се разговарало и за други модалитети што ќе бидат предмет на расправа во петок на средбата на засегнатите компании и надлежните институции, како можноста државата преку ЕСМ да обезбеди поголемо количество на струја со пониска цена, продолжување на процесот на инвестирање во обновливите извори на енергија итн.
Состојбата со гасот се очекува да биде стабилна до крајот на годината, а преговорите за наредната година ќе започнат кон крајот на овој месец.