Ако не ги плати обврските, во долари, до 4 мај, Русија ќе биде официјално во банкрот

Русија повторува дека сака да го отплати својот долг, но дека Западот ја спречил да го стори тоа со воведување строги санкции откако ја нападна Украина на 24 февруари.

Русија можеби веќе банкротирала бидејќи не ги сервисирала своите доларски обврзници поради западните санкции поради војната во Украина, објави денеска меѓународната агенција за кредитни рејтинзи Moody’s , што не се случило од годините веднаш по Октомвриската револуција во 1917 година.

На 4 април, Русија изврши исплати за две државни обврзници – со рок на достасување во 2022 и 2042 година – во рубљи, а не во долари. „Договорите за обврзници не содржат одредби за отплата во која било валута освен долари“, соопшти агенцијата.

„Затоа, Русија, според дефиницијата на Moody’s , може да се смета за банкрот ако не ги исполни обврските во долари до 4 мај, кога истекува едномесечниот период на чекање“, се вели во соопштението на кредитната агенција.

Moody’s тврди дека некои руски еврообврзници издадени по 2018 година дозволуваат плаќање во рубљи под одредени услови, но дека оние постари од тој период не го дозволуваат тоа.

Русија повторува дека сака да го отплати својот долг, но дека Западот ја спречил да го стори тоа со воведување строги санкции откако ја нападна Украина на 24 февруари.

Русија не отплати 40 милијарди долари домашен  долг во 1998 година, па ја девалвираше рубљата во времето на претседателот Борис Елцин, бидејќи практично банкротираше по азиската должничка криза и падот на цената на нафтата.

Русија овој пат има пари, но не може да ги исплати бидејќи западните  земји ги замрзнаа нејзините резерви, четврти по големина во светот.

Тоа би бил првиот голем руски банкрот по  повеќе од еден век. Москва ги отплаќаше  надворешните долгови и по распадот на Советскиот Сојуз.