Алтернатива за влез во Владата ги добива Здравство, Информатичко општество и Дијаспора

Алтернатива ќе добие и заменици министри во Министерство за образование и наука и  Министерството за култура, а за третиот ресор се уште се дискутира.  Директори што ќе ги предложи Алтернатива ќе раководат со неколку институции на централно и локално ниво како што се МЕПСО, Фонд за здравство, Железници, Клинички центар Тетово и Агенција за странски инвестиции.

Алтернатива влегува во Владата, а државата излегува од политичката криза и ќе добие функционално Собрание со стабилно мнозинство, соопштија лидерите на СДСМ и Алтернатива, Зоран Заев и Африм Гаши, по средбата во Клубот на пратениците со која се официјализираше договорот постигнат во преговорите.

За влез во Владата Алтернатива добива три министерства, три заменички места и десетина државни компании и институции.

Алтернатива ќе ги води Министерството за здравство, Министерството за  информатичко општество и Министерството без ресор задолжено за дијаспората. Алтернатива ќе добие и заменици министри во Министерство за образование и наука и  Министерството за култура, а за третиот ресор се уште се дискутира.  Како што рече Заев,  разговараат за заменик министер во Министерството за земјоделие. Директори што ќе ги предложи Алтернатива ќе раководат со неколку институции на централно и локално ниво како што се МЕПСО, Фонд за здравство, Железници, Клинички центар Тетово и Агенција за странски инвестиции.

Засега потврдено е само името на Беким Сали кој ќе го замени Венко Филипче во Министерството за здравство,  а се шпекулира дека во МЕПСО ќе влезе Орхан Муртезани.

„Постигнавме договор со Алтернатива за Влада и парламентарно мнозинство до крајот на актуелниот мандат, односно до 2024 година со амбиции и да продолжи. Постигнатиот договор, е гаранција дека имаме мнозинство кое ќе работи на решенија за сериозните актуелни предизвици како што се обезбедувањето континуитет и успешен епилог на процесот за почеток на преговорите за членство во ЕУ, односно изнаоѓање решение со Република Бугарија, справување со КОВИД -19 пандемијата и глобалната енергетска криза“, изјави премиерот во оставка Зоран Заев.

Тој нагласи дека со формирањето на новото парламентарно мнозинство кое сега брои 64 пратеника нема да има вонредни избори догодина.

Премиерот во оставка потврди дека новиот претседател на СДСМ ќе биде и нов мандатар,  а Заев својата оставка ќе ја депонира на крајот од годинава.