Амбасадорката Брнс на МЕФ: САД ќе ѝ помогне на Северна Македонија да изгради посилен и понезависен енергетски сектор

Третиот по ред Македонски енергетски форум се одржува денеска во Скопје.

Диверзификацијата на енергетските ресурси и намалување на енергетската зависност од Исток е еден од приоритетите на енергетската стратегија на Северна Македонија и останатите држави од Балканот, а САД е силен поддржувач на овие процеси, истакна американската амбасадорка Кејт Брнс на Македонскиот енергетски форум што пред малку започна во Скопје.

„Нашата цел е да ѝ помогнеме на Северна Македонија  и соседите да создадат посилен и понезависен енергетски сектор. Прво, клучна е диверзификацијата. Нашите анализи велат дека Северна Македонија е помеѓу 5 најранливи земји во Европа во случај да се прекине снабдувањето со гасот од Русија. Овие анализи се од пред неколку години и оттогаш работите не се променети. Неодамна, помошникот државен секретар за енергетика Франсис Фанон ја посети земјава и регионот во  мошне интересен период на очигледно збивање на редовите меѓу балканските земји во потрагата по поголема енергетска независност. Тогаш тој рече, и сега јас ќе повторам, дека САД се тука за да ја остварат таа желба – најавени се крупни енергетски регионални проекти што е планирано да се вкрстат токму во Скопје.“, рече амбасадорката Брнс.

Третиот по ред Македонски енергетски форум го поздрави со краток говор премиерот Зоран Заев којшто истакна дека вложувањето во енергетскиот сектор е еден од клучните приоритети на Владата што тој ја раководи.

„Работиме активно на зголемување на понудата на алтернативни решенија во поглед на нашите геостратегиски енергетски позиции. Постепено преминување кон извори на чиста енергија и намалувањето на учеството на јагленот како енергетски извор е нашиот стратешки фокус. Денес сакам да најавам неколку проекти: Прво, почнати се преговори за сопственичко  учество на земјава во изградба на терминалот за течен природен гас во близина на Александропулос, Грција, проект кој создава можност за трајно и стабилно снабдување со гас нашата земја, која ќе стане и точка од каде гасот ќе се дистрибуира во регионот и земјите што ќе покажат интерес. Потоа, во тек се инвестиции во фотоволтаични електрани во Осломеј, проширување на ветропаркот во Богданци, како и мегапроектот Чебрен којшто конечно после безброј одлагања изминатава деценија почнавме да го реализираме“, истакна Заев.

Македонскиот енергетски форум годинава поради ситуацијата со пандемијата се одржува во хибридна форма – делумно онлајн и делумно со панелисти во хотелот Мериот во Скопје. Настанот е организиран  од ЗИП Институтот, Амбасадата на САД во Северна Македонија и македонската влада, а финансиран од Германскиот Маршалов Фонд во САД – Balkans Trust for Democracy, Кралската Норвешка Амбасада во Белград, АД МЕПСО и Делегацијата на ЕУ во Северна Македонија.

Опширен преглед на тоа што се зборуваше на МЕФ ќе може да проследите во овонеделното издание на магазинот Капитал.