Арсовска води пред Шилегов во Скопје со 4.000 разлика, после 80% пребројани гласови

Од скопските општини, после првиот круг, според ДИК од досега избројаните гласови, веќе избрани градоначалници се во Гази Баба – Бобан Стефковски од ВМРО – ДПМНЕ, во Бутел – Дарко Костовски од ВМРО – ДПМНЕ, во Сарај – Блерим Беџети од ДУИ, додека во Аеродром се очекува да победи во прв круг Тимчо Муцунски од ВМРО – ДПМНЕ, во Кисела Вода Орце Ѓорѓиевски од ВМРО – ДПМНЕ и Александар Стојковски од ВМРО – ДПМНЕ во Ѓорче Петров. Во Центар во втор круг влегува Горан Герасимовски со предност пред Наташа Котлар – Трајкова од ВМРО – ДПМНЕ, додека во Карпош во втор круг влегува Душко Весковски од СДСМ, а за второто место се борат Оливер Зафировски од ВМРО – ДПМНЕ и Стевчо Јакимовски од ГРОМ.

Данела Арсовска, независен кандидат поддржана од коалицијата на ВМРО-ДПМНЕ води со околу 4.000 гласови пред актуелниот градоначалник Петре Шилегов од СДСМ во трката за градоначалник на Скопје, според резултатите од околу 80% од досега пребројаните гласови, објавени на сајтот на Државната изборна комисија (ДИК). Арсовска има освоено 37,2% од гласовите, Шилегов 35%.

Од скопските општини, во Центар, после 72,3% пребројани гласови, води кандидатот на коалицијата на СДСМ, Горан Герасимовски со 6.537 гласови (41%), пред Наташа Котлар – Трајкова од ВМРО – ДПМНЕ со 5.279 гласови (33%).

Во Аеродром, после 60% преброени гласови, води Тимчо Муцински од ВМРО – ДПМНЕ со 11.735 гласови (56,7%), пред Александар Филиповски од СДСМ со 5.241 глас (25,3%). Ако остане овој сооднос до крај, Муцунски ќе биде избран за градоначалник на Аеродром уште во првиот круг.

Во општина Кисела Вода, после 77% од пребројаните гласови, води Орце Ѓорѓиевски од ВМРО – ДПМНЕ со 53% од гласовите, речиси двојно повеќе од кандидатот на СДСМ и актуелен градоначалник Филип Темелковски, кој има 27,3%. Ѓорѓиевски се очекува да биде избран уште во првиот круг.

Во општина Карпош, после 78% од пребројаните гласови, води Душко Весковски од СДСМ, со 33,8% од гласовите, а во мртва трка за второто место се Оливер Зафировски од ВМРО – ДПМНЕ со 24,2% од гласовите и Стевчо Јакимовски од ГРОМ, со 24,1%.

Во Ѓорче Петров, после 68% пребројани гласови, води Александар Стојкоски од ВМРО – ДПМНЕ со 49,8% од гласовите, пред Александар Наумоски од СДСМ, со 33,9%. Стојкоски се очекува да ја освои градоначалничката функција уште во првиот круг.

Во Гази Баба, после пребројани речиси сите гласови (98,9%), Бобан Стефковски од ВМРО – ДПМНЕ доби 60% од гласовите и ќе биде новиот градоначалник на општината, а Борис Георгиевски од СДСМ освои 29,5% од гласовите.

Во општина Бутел, Дарко Костовски од ВМРО – ДПМНЕ е избран за градоначалник во првиот круг, со 53% од гласовите, пред Велимир Смилевски од СДСМ, со 40%.

Во Чаир, после 88% од пребројаните гласови, води Висар Ганиу од ДУИ, со 48,7% освоени гласови, пред Беким Сали од Алијанса/Алтернатива, со 37,2%.

Во Шуто Оризари, после 96% пребројани гласови, значи дека во втор круг одат Ферат Асан од СДСМ со 37% од гласовите и Курто Дудуш од ЛДП/ДОМ со 26%.

Во општина Сарај, убедливо во првиот круг победи Блерим Беџети од ДУИ, со 73% освоени гласови, пред Керим Мамути од АА/А, со 18%.