Бајден: Нема шанси Путин да искористи нуклеарно оружје, а тоа да не биде крај на светот

„Путин не се шегува кога вели дека разгледува и користење на тактичко нуклеарно оружје за да го надомести неуспехот на својата војска. Нема начин тоа да се стори, а да не резултира со уништување на светот“, рече Бајден.

Американскиот претседател Џо Бајден вчера одржа говор во којшто истакна дека ризикот од нуклеарен армагедон во моментов е на нивото на коешто бил последен пат во 1962 година за време на Кубанската ракетна криза. Бајден тврди дека причина за тоа е фактот што Русите после осум месеци од нападот врз Украина претрпеле огромни загуби и дека имаат се’ помалку воени опции.

„Ваква ситуација сме немале од времето на Кенеди и Кубанската криза. Путин не се шегува кога вели дека разгледува и користење на тактичко нуклеарно оружје за да го надомести неуспехот на својата војска. Нема начин тоа да се стори, а да не резултира со уништување на светот“, рече Бајден.

Воени аналитичари од САД веќе со месеци предупредуваат дека Русија би можела да искористи оружје за масовно уништување, но исто така неделава американските разузнавачки служби соопштија дека не виделе промена во руските нуклеарни сили поради што САД засега би требало да реагира.

Претседателот на Украина Володимир Зеленски вчера во својот говор истакна дека улогата на НАТО е да ја оневозможи Русија да користи нуклеарно оружје. Апелираше до меѓународната заедница „пред 24 февруари да изврши превентивни удари за да дознае што ќе ѝ се случи ако тоа го искористи, а не обратно, да чека нуклеарни удари од Русија“.

Официјална Москва веднаш го обвини Зеленски дека повикува на нуклеарна војна. Сергеј Никифоров, портпаролот на Зеленски, објасни дека претседателот мислел на превентивни санкции и уверуваше дека Украина никогаш нема да повикува на употреба на нуклеарно оружје, пишува Kyiv Independent.

Михајло Подољак, советник на Зеленски, рече дека Зеленски потсетил на руската нуклеарна уцена и му понудил на светот превентивно да ги прикаже последиците за Русија и да ги засили ударите на земјата вклучувајќи санкции и воена помош за Украина.

Рускиот претседател Владимир Путин претходно се закани со употреба на нуклеарно оружје „во случај да биде загрозен територијалниот интегритет на Русија“.

„Ако нејзиниот територијален интегритет биде загрозен, Русија ќе употреби се’ што може, ова не е блеф“, рече Путин на 21 септември.