Бернар Арно му „избега“ на Илон Маск за 20-тина милијарди долари

Oсновачот и директор на Tesla, а од неодамна сопственик и на Twitter, Илон Маск неколку пати годинава си го менуваше местото “најбогат на светот“ со францускиот милијардер Бернар Арно, којшто ја управува империјата LVMH, под чија капа се еден куп луксузни брендови. Па, така и во моментот на пишување на овој текст, 24 декември, Арно е на првото место на листата најбогати на светот што ја прави Bloomberg, со богатство од 159 милијарди долари.

„Ако не најдеш начин како да правиш пари и додека спиеш, ќе работиш се’ до смрт“, е познат цитат од легендарниот американски инвеститор Ворен Бафет, еден од најбогатите луѓе на планетава. Гледајќи ги износите на личните богатства на најбогатите во светот, би рекле дека тие може да си спијат и по цели денови без да се грижат за нешто. Но, многумина од нив неретко работат и по 15-16 часа на ден, фокусирани на повеќе проекти одеднаш, како што е Илон Маск, на пример. Затоа што основачот и директор на Tesla, а од неодамна сопственик и на Twitter,  има речено, дека “никој не го променил светот со 40-часа работа неделно“.

Кога сме кај Маск, тој неколку пати годинава си го менуваше местото “најбогат на светот“ со францускиот милијардер Бернар Арно, којшто ја управува империјата LVMH, под чија капа се еден куп луксузни брендови. Па, така и во моментот на пишување на овој текст, 24 декември, Арно е на првото место на листата најбогати на светот што ја прави Bloomberg, со богатство од 159 милијарди долари.

Како ја прави Bloomberg оваа листа? Според вредноста на акциите што милијардерите ги поседуваат во компаниите што ги предводат, но и удели во други компании. Затоа и вредноста на нивните богатства се менува секој ден, секој час, како што растат или паѓаат акциите на нивните компании. На пример, Илон Маск “загубил“ дури 132 милијарди оваа година, затоа што акциите на Tesla, каде што е најголем акционер, паднале за цели 70% од први јануари досега.

Или да звучи уште поспектакуларно, десетте најбогати луѓе на светот годинава загубиле речиси 395 милијарди долари. Добро, не ги загубиле буквално, туку нивното портфолио на акции сега вреди за толку помалку. Победник годинава е само индискиот милијардер Гаутам Адани, чиешто богатство се зголемило за скоро 40 милијарди долари годинава, и затоа не случајно во 2023 влегува како третиот најбогат човек на планетава.

Падот на светските берзи што се случи годинава како последица на постпандемиските нарушувања на пазарите и војната во Украина, ги погоди речиси сите милијардери, особено оние од технолошките бизниси.

Па, така, освен Маск, големи губитници годинава се и Џеф Безос (Amazon) со минус 84 милијарди долари, Лери Пејџ и Сергеј Брин (Google) со по околу 44 милијарди секој,  Бил Гејтс (Microsoft) со 28,7 милијарди, Стив Балмер (Microsof) со 20,2 милијарди, итн.

Според Forbes пак, бројот на милијардерите во светот ќе биде 2.668 на крајот од оваа 2022 година. Голем дел од нив се основачи на технолошки гиганти, со значителен удел од нивното богатство сè уште инвестирано во тие фирми. Некои пак, се едноставно ултра-богати наследници на бизнис империи, имоти и сл., уживајќи ги до максимум плодовите на она што го создале нивните предци.