Британски универзитет воведе предмет за свесност и будење на надежта

Поради фактот што голем број млади се чувствуваат напнато и вознемирено, особено поради климатските промени, и не гледаат надеж за иднина, универзитетот East Anglia ја лансираше програмата „Mindfulness and Active Hope“ (Свесност/будност и активна надеж).  Во текот на шест неделни сесии, студентите учат како со техниките на будност/свесност или „mindfulness“ да ги смират негативните мисли, да го свртат вниманието кон сопственото, внатрешно битие и да изградат рутина на грижа за себе.

Компанијата The Lancet  пред нешто повеќе од една година ги претстави поразителните резултати од истражувањето за емоционалната состојба на младите, особено во однос на таканаречената еко-анксиозност, односно стравот дека иднината едноставно не постои, бидејќи нема да ја има ниту планетава.

Во истражувањето учествувале 10.000 млади луѓе (од 16 до 25 години) од десет земји, а дури 45 отсто од нив изјавиле дека нивните чувства за климатските промени негативно влијаат на нивното секојдневие. Повеќето од нив имаат негативен став кон климатските промени, односно веруваат дека работите галопираат надолу, и дека има мала надеж за спас. Ваквите лоши резултати, објаснуваат истражувачите, се резултат на несоодветните владини политики, слаб одговор на растечките климатски предизвици што ги тераат младите да се чувствуваат разочарани.

Бидејќи владејачките гарнитури  се фокусираа на други проблеми (ако воопшто решаваат некои) и глобалната ситуација не ветува ништо добро,  организациите како Универзитетот East Anglia решија да ги преземат работите во свои раце.

Во партнерство со организациите за ментално здравје Norfolk и Waveney Mind, универзитетот ја лансираше програмата „Mindfulness and Active Hope“ (Свесност/будност и активна надеж), единствениот курс од ваков вид во В. Британија и пошироко. Во текот на шест неделни сесии, студентите добиваат поддршка, учат вештини за справување со реалниот свет и како да се трансформира еко-анксиозноста во „активна надеж“. Техниките на будност/свесност или „mindfulness“ им помагаат да ги смират негативните мисли, да го свртат вниманието кон сопственото, внатрешно битие и да изградат рутина на грижа за себе.

Курсот се базира на меѓународниот бестселер на Џоан Мејси и Крис Џонстон „Активна надеж: Како да се соочиме со нередот во кој сме без да полудиме  (Active Hope: How to Face the Mess We‘re in without Going Crazy) “, во кој авторите презентираат методи на зајакнување во време на лична или макрокриза, кои се базираат за идеи од светот на митологијата, духовноста, холистичката наука и модерната психологија. Иако книгата е напишана пред точно десет години, таа е потребна сега повеќе од кога било и останува да се надеваме дека домашните организации (особено политичките) ќе го следат примерот на британскиот универзитет и ќе се посветат на младите, на чиј грб иднината навистина почива.