Вакцината против Ковид-19 што ја развива AstraZeneca покажала имунолошки одговор и кај постари лица

Наодите од крвните тестови правени кај групата постари пациенти, се во прилог на податоците од месец јули коишто покажаа дека вакцината предизвикува силен имунолошки одговор кај здрави возрасни испитаници од старосната група 18 – 55 години.

Вакцината што британската фармацевтска компанија AstraZeneca ја развива за превенција од коронавирусот покажала силен имунолошки одговор кај постарите луѓе, вели извештај што го посочува Financial Times. Цитирајќи два неидентификувани извори наводно блиски до истражувањето, FT вели дека вакцината продуцирала заштитни антитела во рамки на постарата популација чии што претставници се вклучени во развојот на вакцината.

AstraZeneca ја развива вакцината во соработка со Универзитетот Оксфорд. Извештајот понатаму вели дека наодите од крвните тестови правени кај групата постари пациенти, се во прилог на податоците од месец јули коишто покажаа дека вакцината предизвикува силен имунолошки одговор кај здрави возрасни испитаници од старосната група 18 – 55 години.
AstraZeneca, заедно со Pfizer и Moderna се меѓу најистурените „играчи“ во глобалната фармацевтска индустрија којашто моментално трескавично работи на пронаоѓање ефективна вакцина за превенција од коронавирусот.
AstraZeneca доби повторно дозвола од американските регулатори да ги продолжи тестирањата во САД откако повеќе од месец дена беа прекинати по наводите дека доброволец во истражувањето се разболел.

Инаку, деновиве почина доброволец во истражувањето на вакцината на AstraZeneca во Бразил, но тестирањата во оваа земја не сопреа, а тамошните регулатори не дадоа повеќе детали.