Владата ги усвои новите ковид мерки: администрацијата ќе работи во смени, онлајн или со ротации

Се ограничува работното време на сите угостителски објекти до 23 часот, освен за оние што вршат испорака. Исто така, се ограничува капацитетот на патници во возилата на јавниот превоз на 50% од вкупниот број патници предвидени во едно возило.

На вчершната 13-та седница, Владата на Република Северна Македонија ги прифати препораките на Комисијата за заразни болести да се ограничи работното време на сите угостителски објекти до 23 часот, освен за оние што вршат испорака, информираат од Владата.

Дополнително, на денешната седница е одлучено да се ограничи капацитетот на патници во возилата на јавниот превоз на 50% од вкупниот број на патници предвидени во едно возило.

Исто така, Владата ја прифатила и препораката, во целата државна и јавна администрација, општините и судовите, согласно принципот на работа и работниот процес, организирање на работата да се одвива во смени или онлајн од дома, или пак редуцирано со систем на ротации, зависно од карактеристиките на работниот процес на институциите, се додава во владиното соопштение.

Вчера пред пратениците во Собранието се најде и новиот пакет мерки за спречување на ширењето на коронавирусот, односно, мерката за задолжително носење маски на отворено, ограничување на групирањето на отворено по 22 часот, како и ограничувањето на семејни собири. Но, за нив не се расправаше, откако опозициска партија ВМРО-ДПМНЕ побара дополнително време да ги разгледа.

Ширум земјава, во последните 24 часа, регистрирани беа 408 новозаразени, четворица починати и 281 оздравен од Ковид-19.