Во Македонија во училишта, во Хрватска во судови и шопинг молови: бран од дојави за поставени бомби ја потресува јавноста

Утрово повеќе судови низ цела Хрватска добија дојави за наводно поставени бомби. Потоа и неколку шопинг молови – Славонски Брод, Винковци, итн. –  добија исти такви дојави.

Утрово повеќе судови низ цела Хрватска добија дојави за наводно поставени бомби. Потоа и неколку шопинг молови – Славонски Брод, Винковци, итн. –  добија исти такви дојави. Вработените во сите објекти кои биле под закана се евакуирани, а полицијата ги пребарува просториите. Во дојавите има закани и за хрватската влада. Засега сите дојави се покажани како лажни, но јавноста е вознемирена, известуваат тамошните медиуми.

Криминалистот Тончи Продан за N1 телевизијата коментираше околу низата анонимни дојави за наводно поставени бомби.

„Ваквите ситуации секако се непријатни, кога на повеќе адреси пристигнуваат дојави за подметнати експлозивни направи и безбедносно и индикативно ги ставаат  полицијата и граѓаните во ситуација која на некој начин е кризна. Секоја дојава треба да се смета за реална закана“, рече Продан.

Денешните закани ги подели на две групи. „Првата група се заканите за судовите, како онаа дојава за бомба во  Врховниот суд, таму е со причина, бидејќи знаеме дека украинска делегација дојде на средба.  Дали оваа закана е диригирана од руска страна… Секако руските интереси се реализираат на хибридни начини. Ако прашате дали Хрватска е особено загрозена во споредба со другите земји,  не е. Таа и припаѓа на ЕУ, западниот цивилизиран културен демократски свет кој застана на страната на Украина. Хрватска не е посебна мета овде, ниту направила нешто што таквите кругови би требало да го сфатат како зло“, вели Продан.