Во петок 21. Годишна конференција на Македонската берза: геополитика и енергетика во фокусот

Геополитика, енергетика и банки – ова ќе бидат клучните теми на коишто ќе се дискутира во петок, 23 септември, на 21. Годишна конференција на Македонската берза, што ќе се одржи традиционално во Охрид.

Геополитика, енергетика, банки и новите проекти на Берзата – ова ќе бидат клучните теми на коишто ќе се дискутира во петок, 23 септември, на 21. Годишна конференција на Македонската берза, што ќе се одржи традиционално во Охрид.

„Најпрвин да кажам дека сме среќни што после две години, поради добро познатите причини околу пандемијата, повторно ја организираме нашата традиционална годишна конференција во живо. Свесни за тековните економски и геополитички моменти, се потрудивме темите на овогодишната конференција да бидат максимално актуелни. Покрај воведните обраќања на највисоко ниво, ќе имаме два централни панела и повеќе презентации.“, вели за Капитал главниот извршен директор на Берзата, Иван Штериев.

Тој вели дека едниот панел ќе  биде  посветен на енергетиката, со наслов „Ќе има ли долга и студена зима?“, на којшто ќе зборува странски инвестициски аналитичар специјализиран за енергетскиот сектор, а  гостин на Конференцијата  ќе биде директорот на словенечката берза за струја, како и реномирани македонски говорници за оваа тема.

Вториот панел е фокусиран на банките и насловен „Банките во новата реалност“.

„На Македонската берза има доста котирани банки, најмногу во споредба со другите пазари во регионот, и тие ни се еден од главните инструменти што се тргуваат на пазарот, а сите најнови случувања – инфлација, промени на каматни стапки итн. – секако, кај банките имаат повеќекратно влијание. Ќе имаме прилика од претставници на четирите најголеми македонски банки да слушнеме што се случува во секторот и кои се нивните размислувања и предвидувања. Генерален спонзор на конференцијата е PricewaterhouseCoopers и имаме нивен висок претставник кој ќе зборува за моменталниот геополитички контекст и како тоа се одразува на светската економија.“, открива Штериев.

Со оглед на тоа што изминатиов период додека немаше конференции, Берзата реализираше неколку битни стратешки проекти, како што е новиот Кодекс за корпоративно управување и Водичот за ESG известување на котираните компании, па на настанот обезбедено е  учество на креаторите на овие стратешки документи, водечки консултанти од В. Британија и од Холандија. Тие ќе зборуваат за овие теми генерално и ќе објаснат подетално за овие проекти.