Во потрага по Титаник, потона и Титан

Подморницата Титан која превезуваше  туристи до потонатиот брод Титаник на дното на Атлантскиот Океан имплодираше. Оваа претпоставка за најверојатниот крај на подморницата и луѓето кои се наоѓале во неа ја дадоа  експертите врз основа на пронајдените остатоци. Недалеку од потонатиот брод Титаник, пронајдени беа повеќе  остатоци од подморницата Титан, а меѓу нив бил и опашот во кој се наоѓала комората за одржување на притисокот во пловилото.  Се претпоставува дека подморницата имплодирала  еден час и 45 минути по лансирањето, односно во моментот кога комуникацијата со бродот престанала, во неделата на 18 јуни. Имплозијата е спротивен процес на експлозијата. Имено, при експлозија, енергијата во внатрешноста на објектот наеднаш се шири  кон надвор и на тој начин го уништува. За време на имплозија, околниот притисок е многу поголем од внатрешниот притисок, а предметот практично ќе се „сплеска“, односно настанува негова ненадејна компресија. Ако е за утеха, експертите велат смртта кај патниците настапила во дел од секунда и не настрадале во агонија, како при снемување на кислород, што беа впрочем и првичните претпоставки.