Големо чудовиште јури низ вселената и создава ѕвезди

Ова што гледате на фотографијата е уметничка интерпретација на она што американските научници го открија со моќниот телескоп Хабл неодамна: необична светла трага која има едно најверојатно објаснување. Се работи за огромна црна дупка што по судир на галаксии е лансирана во вселената.

Според студијата објавена  деновиве тоа лансирано чудовиште продолжило да патува низ облаците од гасови покренувајќи во нив создавање на млади ѕвезди коишто на снимките на славниот телескоп се забележуваат како многу долга светла линија.

На снимката од електронската камера на Хабл  космичките зраци коишто проаѓаат низ детекторот главно изгледаат како гребаници. Но, откако научниците направиле спектроскопска анализа на чудната линија, сфатиле дека се работи за ланец на млади сини ѕвезди долг 200 илјади светлосни години. Една светлосна година е растојание од 9.460 милијарди километри, па сега замислете колкава должина се  200 илјади светлосни години.