Дали новиот лек против ковид на Мерк може да донесе пресврт во пандемијата?

Лекот што американската фармацевтска компанија Мерк (Merck) го разви, наречен молнупиравир, се очекува да третира благи до средни форми на Ковид – 19 кај возрасни пациенти што имаат најголема шанса да развијат тешка форма на болеста и хоспитализација, затоа што се на постара возраст или страдаат од хронични болести, како дијабетес, срцеви заболувања, итн.

Новата пилула  што третира Ковид – 19 се’ уште чека одобрение од федералната агенција за лекови и храна (ФДА) на САД и според многумина може да направи пресврт во ситуацијата со пандемијата, но експертите од сојузната американска држава Јута сметаат дека антивирусниот лек не е всушност лек и дека нема да ги замени целосно вакцините и останатите мерки на превенција, како носењето маски и сл.

Лекот што американската фармацевтска компанија Мерк (Merck) го разви, наречен молнупиравир, се очекува да третира благи до средни форми на Ковид – 19 кај возрасни пациенти што имаат најголема шанса да развијат тешка форма на болеста и хоспитализација, затоа што се на постара возраст или страдаат од хронични болести, како дијабетес, срцеви заболувања, итн.

Молнупиравир го намалил ризикот од хоспитализација или смрт за околу 50%, според најновиот извештај на Мерк и компанијата Риџбек Биотерапеутикс (Ridgeback Biotherapeutics). Овие резултати се толку добри, според Мерк, што тестирањето било прекинато предвреме.

Дозата од 40 апчиња предвидена за 5 дена третман е полесна за аплицирање и поевтина (чини 700 долари)  од оние третмани за вирусот  што во моментов се одобрени од федералните власти, а коишто бараат инјектирање или инфузија.

„Молнупиравир има потенцијал да направи голема промена во начинот на коишто ги лекуваме пациентите“, вели др. Брендон Веб, специјалист инфектолог во Интермаунтин Хелткер (Intermountin Healthcare) болницата во Солт Лејк Сити, Јута, којашто е дел од најголемиот регионален здравствен систем.

Меѓутоа, др. Веб смета дека луѓето се’ уште треба да настојуваат да го избегнат вирусот, со тоа што ќе се вакцинираат или ќе ги следат веќе долго посочуваните мерки за превенција, како носењето маски и социјалната дистанца, но и избегнувањето на поголеми групни собирања.

Според Веб, вакцините пружаат многу поголемо ниво на заштита од хоспитализација или смрт отколку новиот лек на Мерк, којшто се очекува да биде дистрибуиран до сојузните држави преку федералната власт,  и како што вели докторот, да биде достапен само до една третина од пациентите што ќе испаднат позитивни на Ковид -19.

Хан Ким, професор по јавно здравје на Вестминстер колеџот во Солт Лејк Сити, вели дека е загрижен поради можноста молнупиравир да го дестимулира вакцинирањето. Во моментов, само околу 53% од сите жители на Јута се целосно вакцинирани.

„Се плашам дека луѓето премногу ќе се потпираат на овој нов медикамент како на ‘волшебен лек’, наместо на некои други ‘оружја од арсеналот’ коишто може да ги олеснат симптомите на Ковид-19 но не ветуваат крај на пандемијата “, вели Ким.

Координаторот за борба против коронавирусот при Белата Куќа, Џеф Зиентс, исто така вели дека вакцините се клучното оружје, а не третманите со лекови.

“Треба да запомниме дека вакцинацијата, останува засега најдобра алатка против Ковид – 19. Таа може да ве заштити од добивање на Ковид, а ние сакаме да ја спречиме инфекцијата, не само да ја третираме откако ќе се случи.“

Др. Ким пак вели дека развивањето нови лекови против Ковид-19 е многу важно, затоа што вирусот многу веројатно дека ќе стане ендемичен.

„Ова е вирус со кого што ќе мора да живееме уште долго време, затоа мислам дека лекот на Мерк е многу позитивен момент и секако, ни требаат повеќе вакви во иднина. Ни требаат повеќе лекови коишто ќе бидат поевтини и полесни за земање“., вели Ким.

Молнупиравир би бил првиот лек за третирање на коронавирусот во форма на пилула, одобрен од федералната влада. Останатите лекови, ремдесивир и моноклоналните антитела, се администрираат интравенозно. Ремдесивир е за пациенти што се веќе хоспитализирани, а моноклоналните антитела мора да се дадат во пораните фази на инфекцијата.