Димитров вели дека добил поддршка од многу меѓународни пријатели да биде премиер

Овие пораки, како што вели вицепремиерот за европски прашања во заминување, од коалицијата не биле прифатени со објаснување дека бил нереален идеалист, премногу принципиелен и не се разбирал од меѓупартиски пазари. „За мене овие критики се комплименти“, рече Димитров.

Вицепремиерот за европски прашања во заминување, Никола Димитров, на денешната прес конференција откри и дека, наводно, добил поддршка од дел од меѓународната заедница да биде нов премиер по оставката на Зоран Заев.

„Некои од вас веќе знаат, и тоа не е тајна, после оставката на премиерот Заев, многу меѓународни пријатели се јавија со поддршка за јас да ја преземам Владата. Пораки што од коалицијата не беа прифатени со следново објаснување кажано на дел од вас новинарите: сум бил нереален идеалист, премногу принципиелен и не сум се разбирал од меѓупартиски пазари. За мене овие критики се комплименти и ако за овие политички особини нема место во оваа идна Влада, мора да им најдеме место во македонската политика и во македонското општество. Граѓаните кои тоа го бараат, граѓаните кои за тоа се бореа и се борат, заслужуваат да им се чуе гласот што сега повторно е потиснат од партиските вреви.“, рече Димитров.

На шпекулациите што се јавуваат деновиве околу можностите тој да формира партија, Димитров одговори дека нему „не му е важна формата, ни организацијата, ни функцијата, важни се принципите и заложбата за нив.“

„Нова партија? Што ќе ни е нова партија ако е поставена врз столбови врз коишто веќе се поставени постоечките партии? Сме се изнагледале низ годиниве и трети опции и нови партии потполно вклучени во истиот клиентелистички партиски апарат. Таква нова партија не ни треба. Тоа што ни треба е отворање на еден непријатен разговор за вистински промени на самиот систем. Јас ви ветувам дека ќе најдам начин тој разговор да го отворам и дека за тие промени ќе се борам и тој разговор нема да биде завршен додека сите барања од Револуцијата што требаше да донесе промени и дома, не само надвор, не бидат исполнети.“, рече Димитров.