Директорката на ММФ, Георгиева, го „преживеа“ скандалот со Дуинг Бизнис

Извршниот одбор на ММФ смета дека нема јасни докази оти Кристалина Георгиева, додека била извршна директорка на Светската банка ја злоупотребила својата позиција и влијаела врз изработувачите на извештајот „Дуинг Бизнис 2018“ да „шминкаат“ некои податоци во корист на Кина и други земји.

Извршниот одбор на Меѓународниот монетарен фонд (ММФ) смета дека нема јасни докази оти актуелната директорка  на ММФ, Кристалина Георгиева, имала компромитирачка улога во врска со извештајот Дуинг бизнис 2018, додека била извршен директор на Светската банка.

“Откако ги погледнавме сите расположливи докази, Извршниот одбор ја потврдува својата целосна доверба во лидерството на директорката и нејзината способност да продолжи ефективно да ги исполнува нејзините должности. Бордот верува во посветеноста на директорката да одржи највисоки стандарди на водство и интегритет во ММФ“ , се вели во официјалното соопштение на  ММФ.

Да потсетиме, Кристалина Георгиева се најде во фокусот на скандалот неодамна, откако Светската банка го откажа објавувањето на својот познат извештај  „Дуинг бизнис“ (Doing Business) којшто ја оценуваше бизнис климата на земјите во светот, бидејќи  внатрешната истрага покажала дека членови на високото раководство на Банката вршеле притисок врз изработувачите на извештајот да менуваат податоци што влијаат врз рангирањето на Кина и некои други земји.

Во редот на раководителите се и поранешната извршна директорка на Светската банка, Кристалина Георгиева, којашто сега е директор на Меѓународниот монетарен фонд, како и тогашниот претседател на Светска банка, Џим Јонг Ким.