Директорот на ЕСМ: во јануари ново поскапување на струјата

Во четврток неделава државата ќе прогласи нова кризна состојба на пазарот со струја, која ќе стапи на сила од први септември, потврдија од Министерството за економија.

Во јануари, според генералниот директор на ЕСМ Васко Ковачевски, се очекува ново поскапување на струјата.

– Веќе е сигурно дека ќе има поскапување, но јас секогаш протежирам тоа да биде благо поскапување, изјави Ковачевски за ТВ 24.

Во однос на престојната зима, Ковачевски повтори дека струја ќе има и дека рестрикциите не се опција.

„Сите најави и показатели за наредните месеци покажуваат дека пред нас престои една од најтешките зими во последните 70 години. Мораме да бидеме максимално подготвени“, рече Ковачевски, уверувајќи дека ЕСМ ги има ставено во функција сите расположливи капацитети и дека нема да се увезува електрична енергија.

Од Владата инаку веќе признаа дека не’ очекува тешка зима од аспект на потрошувачка на електрична енергија. Министерот за економија Крешник Бектеши рече неодамна дека ќе се купува електрична енергија, но и јаглен и мазут.

„Планирано е да работат сите три блока во РЕК „Битола“, ТЕЦ „Осломеј“, ТЕЦ „Неготино“, а во моментов треба да ги зачуваме хидроенергетските капацитети за да имаме електрична енергија за зимскиот период“, рече Бектеши.

Во четврток неделава државата ќе прогласи нова кризна состојба на пазарот со струја, која ќе стапи на сила од први септември, потврдија од Министерството за економија.

Ова е втора по ред од почетокот на годинава. Со прогласувањето државата ќе може финансиски да го помага ЕСМ да набавува јаглен и мазут за да може да се стават во функција сите енергетски капацитети.

Од први септември на сила ќе стапат и препораките за штедење на електрична енергија. Меѓу препораките е исклучување на уличното осветлување наизменично на секоја втора улица.