Доаѓа вистински кошмар за економиите: стагфлација како во 1970-те!?

Светската банка во вторникот ја коригираше надолу прогнозата за раст на глобалната економија годинава, од 4,1% на 2,9%, за разлика од растот од 5,7% забележан лани.

Една од најважните финансиски институции во светот со ова само се придружи кон големиот број песимистични аналитичари коишто излегуваат со лоши предвидувања за светските економски текови деновиве. Што е најлошо, од Светската банка алармираат дека многу земји би можеле да влезат во рецесија, односно во период на стагфлација карактеристичен за 1970-те години од минатиот век. Стагфлација е најлошото сценарио, вистински кошмар  за креаторите на економски политики, кога истовремено имаме висока стапка на инфлација, а економската активност забавува и невработеноста расте.

Растот во земјите во развој, се очекува да биде 3,4%, за разлика од 6,6% во 2021, што е доста пониско од годишниот просек од 4,8% карактеристичен за периодот од 2011 до 2019 година.

“Војната во Украина, локдауните во Кина, нарушените синџири на снабдување и ризиците од стагфлација го рушат економскиот раст. За многу земји, рецесијата ќе биде тешко да се избегне“, рече претседателот на Светската Банка Дејвид Малпас.