Закерберг, шефот на Meta(Facebook) по отпуштањето на 11.000 луѓе: Знам, за се’ сум крив, ве молам простете ми

Вредноста на акцијата на Meta од почетокот на годинава е падната за 70%, но откако Закерберг ги најави плановите за рационализација на трошоците (читај: отпуштањата), кај инвеститорите се врати довербата и акцијата е порасната за преку 15% последниве 4 дена.

Марк Закерберг, директорот на Meta, компанијата под чијашто капа се социјалните медиуми Facebook, Instagram и WhatsApp, ја презеде одговорноста и им  се извини на вработените поради состојбата во којашто го довел бизнисот, предизвикувајќи масовни отпуштања.

„Сакам да преземам одговорност за овие одлуки и за тоа како стигнавме до овде. Знам дека ова е тешко за сите, и особено ми е жал за оние што се засегнати“, напиша Закерберг во своето обраќање до вработените вчера.

Да потсетиме, Meta вчера објави дека отпушта 13% од своите вработени, или повеќе од 11.000 луѓе.

„Денеска ја споделувам со вас една од најтешките промени што ги правиме во историјата на Мета. Решив да го намалиме нашиот тим за околу 13% и да пуштиме да си заминат повеќе од 11.000 наши талентирани вработени. Исто така, преземаме и повеќе дополнителни чекори со цел да станеме поефикасна компанија преку кратење на несуштинските трошоци и продолжување на периодот на стопирање на нови вработувања и во првиот квартал следната година.“, изјави Закерберг, инаку и ко-основач на Фејсбук, во своето писмо.  

Отпуштањата се случија во тежок период за Meta, којашто покажа лоши резултати во последниот квартал, предизвикувајќи и онака разнишаната вредност на акцијата, да потоне уште повеќе. Вредноста на акцијата на Meta од почетокот на годинава е падната за 70%, но откако Закерберг ги најави плановите за рационализација на трошоците (читај: отпуштањата), кај инвеститорите се врати довербата и акцијата е порасната за преку 15% последниве 4 дена.

Инвеститорите беа загрижени за растечките трошоци на Meta, којшто пораснале за 19% во третиот квартал, во однос на истиот период лани, на 22,1 милијарди долари. Вкупните продажби на компанијата паднале за 4%, на 27,7 милијарди долари, додека оперативниот приход се намалил за дури 46%, на 5,7 милијарди долари.

„Ова е тажен момент, и нема дилема околу тоа. До оние коишто ќе си заминат, би сакал да упатам благодарност уште еднаш за се’ што сторивте за компанијата“, вели Закерберг во писмото.

Тој објаснува и дека направил погрешна проценка околу растот на приходите на дигиталните платформи што Meta ги менаџира, поради што и всушност направил огромни инвестиции.

„За жал, работите не се одвиваа како што очекував. Не само што онлајн трговијата не се врати на претходните трендови, туку и макроекономското влошување и зголемената конкуренција предизвикаа нашите приходи да бидат многу помали одошто очекував. Тука погрешив, и преземам одговорност за тоа. “, вели Закерберг во писмото.

Инвеститорите, инаку, му забележуваат на Закерберг што премногу инвестира во метаверзумот (metaverse), којшто е дигитален свет во развој, каде што ќе може да пристапуваме преку посебни направи за виртуелна и засилена реалност (virtual reality and augmented reality headsets). Овие вложувања досега ја чинеа Мета околу 10 милијарди долари само во 2022 година, а компанијата предвидува дека трошоците значително ќе растат следниве години.