Запознајте го Синдекс, стартапот на Михајло Штерјов, креатор на играта SciGirl: The Internship, што доби инвестиција од Акцелератор УКИМ

Играта што Синдекс ја развива  ќе биде достапна и  за компјутери и за играчки конзоли, а Штерјов го истакнува фактот дека се првото македонско студио за игри кое има добиено лиценци за објавување на игра на конзолите PlayStation, Xbox и Nintendo.

Акцелераторот УКИМ неодамна објави две инвестиции –  во решениетоLista на стартапот Брандер Студио и во играта SciGirl: The Internship на стартапот Синдекс, кои учествуваа во Акцелераторската програма БАУ АПА2021. 

Околу Lista пишувавме пред неколку денови, овој пат ви го претставуваме проектот на стартапот Синдекс.

SciGirl: The Internship (Девојката научник: Практикантска работа), е 2D акциона-авантуристичка игра, платформер, за девојка по име Соња, која започнала со пракса во лабораторија каде што таа и нејзиниот професор работат на стабилизирање на хемикалија со која можат да ги намалат или зголемат предметите и живата материја.

„Во оваа игра, протагонистот Соња ќе биде во потрага по професорот, кој се води како исчезнат поради грешка што се случила додека правеле тестови со хемикалијата. Ќе имаме 12 нивоа кои ќе бидат поделени на четири (4) света: Нано-свет, Микро-свет, Мили-свет и Мини-свет. После секое трето ниво ќе има непријател кој ќе треба да го поминете за да продолжите во новиот свет. Рачно нацртаниот дизајн доволува уникатно искуство, каде играчите треба да решаваат едноставни, но предизвикувачки загатки и да се спротивстават на непријателите во потрагата на главниот лик, раскажана преку интересна приказна претставена во мешана форма на стрип и игра. Уникатната механика која е единствена за оваа игра, а не е претставена во друга, е намалувањето и зголемувањето на предмети и жива материја.“, објаснува Михајло Штерјов, основач на Синдекс.

Тој додава дека играта  ќе биде достапна и  за компјутери и за играчки конзоли, а го истакнува фактот дека се првото македонско студио за игри кое има добиено лиценци за објавување на игра на конзолите PlayStation, Xbox и Nintendo.

Инаку, Sindex е новооснована спин-оф компанија од членови во Web Factory, компанија која постои 12 години и која претставува стратешки технолошки партнер на многу компании кои имаат потреба од изработка на некакво дигитално решение во индустриите: Fintech, Healthcare, Hospitality и Entertainment.

Штерјов вели дека како и во секоја индустрија, така и во ИТ, почетоците не се лесни, но пасијата, желбата и страста кон технологијата се двигателите кои што им даваат мотив да продолжат  и да го правиме тоа што најмногу го сакаат.

„Во 2009 година, кога започнавме со Web Factory, поставивме неколку цели што сакавме да ги оствариме. Најважно беше да се изгради место што ќе ни помогне да создаваме, да се развиваме и да го извлечеме најдоброто од нас. Место каде луѓето можат да станат подобра верзија за себе, да го постигнат својот целосен потенцијал и да ја изразат својата страст. Од 2009- та па до денес успешно ја развиваме таа приказна преку работа со клиенти на 4 континенти (Америка, Европа, Азија и Австралија). “, вели Штерјов.

Искуството што го имале со БАУ Акцелераторската програма, додава тој, било од големо значење за тимот којшто  веќе две  години работи на својот продукт. За време на акцелераторската програма со помош на БАУ тимот и менторите кои беа вклучени успеале подлабоко да навлезат во анализа на конкурентите и да ја развијат  основата на каналите за продажба и маркетинг која ќе им  помогне да ја изберат издавачката куќа која ќе им  ја објави играта.

„Исто така направивме подетално финансиско предвидување за наредните 3 години со кое го валидиравме продуктот дека има голем потенцијал на глобалниот пазар и на која основа БАУ акцелераторот се реши да стане наш стратешки партнер со својата инвестиција.“

Акцелераторот УКИМ во соработка со програмата Star Venture на ЕБОР ја спроведе Акцелераторската Програма Есен  2021 година (AПA2021), во која се вклучија реномирани локални, регионални и глобални експерти, а четири глобални успешни стартапи ги споделија своите приказни, успеси и неуспеси.

„Експертите со своето разновидно искуство и знаење обезбедија вредни перспективи за усовршување на учесниците во АПА2021 и ги подготвија за инвестирање и освојување на пазарот. Како резултат на оваа програма, Акцелераторот УКИМ ги претстави првите паметни инвестиции во решението Lista и во играта SciGirl: The Internship, и очекува да инвестира уште во неколку стартапи од учесниците во АПА2021“, истакна Александар Стамболиев, директор на Акцелератор УКИМ.

Подетално околу развојот на SciGirl: The Internship  и соработката со Акцелератор УКИМ ќе може да прочитате во сторијата што ќе излезе во печатеното издание на магазинот Капитал, на 28 јануари.