Илон Маск покренува своја AI платформа што ја нарече ‘TruthGPT’

Овој нов потег на Маск дојде откако тој и група експерти за вештачка интелигенција потпишаа писмо  во кое повикуваат  на шестмесечна пауза во развојот на моќните GPT-4 системи на OpenAI, тврдејќи дека тие потенцијално претставуваат голем безбедносен ризик. Иако и самиот призна дека предоцна го започнал развојот, верува дека ќе успее да создаде „трета опција“ која ќе им конкурира на Google и Microsoft.

Сеприсутниот Илон Маск деновиве објави дека лансира платформа за вештачка интелигенција наречена „TruthGPT“ за да се натпреварува со Microsoft и Google на тоа подрачје. Тој, исто така, си зеде слобода па ја критикуваше неговата, всушност, поранешна компанија OpenAI (Маск е еден од ко-основачите) која сега е во партнерство со Microsoft и која стои зад ChatGPT за „обучување на вештачката интелигенција да лаже“ и дека OpenAI сега станала „затворен извор (како спротивност на замислата за т.н. open source концепт, н.з.) и профитна организација тесно поврзана со Microsoft“.

Но, тој не застана тука. На мета се најде  и Лери Пејџ, ко-основачот на Google, кого го обвини дека не ги сфаќа сериозно безбедносните прашања со вештачката интелигенција.

AI што ќе ја бара вистината и ќе се труди да ја разбере природата на универзумот

„Ќе лансирам нешто што ќе го наречам ‘TruthGPT’, односно вештачка интелигенција која се труди колку што е можно повеќе да ја бара вистината и да ја разбере природата на универзумот “, рече Маск во интервју со новинарот на Fox News Такер Карлсон (сега веќе поранешен, н.з.).

„Мислам дека тоа би можело да биде најдобриот пат до безбедноста – во смисла дека вештачката интелигенција која се грижи за разбирање на универзумот веројатно нема да ги уништи луѓето бидејќи ние сме интересен дел од универзумот“,  додаде Маск.

Иако и самиот призна дека предоцна го започнал развојот, верува дека ќе успее да создаде „трета опција“ која ќе им конкурира на Google и Microsoft. А дека е сериозен, тој покажа со ангажирањето  истражувачи за вештачка интелигенција од Google и други компании и стартапи за вештачка интелигенција за да му се придружат во соборувањето на гигантите Microsoft и Google. Исто така, минатиот месец Маск регистрираше компанија наречена X.AI Corp, со седиште во Невада. Компанијата го наведе Маск како единствен директор, а Џеред Бирчал, главен  директор на семејната канцеларија на Маск, како секретар на новата компанија.

Опасност од ништување на цивилизацијата

Овој нов потег на Маск дојде откако тој и група експерти за вештачка интелигенција потпишаа писмо  во кое повикуваат  на шестмесечна пауза во развојот на моќните GPT-4 системи на OpenAI, тврдејќи дека тие потенцијално претставуваат голем безбедносен ризик. Маск ги повтори своите предупредувања за вештачката интелигенција за време на интервјуто со Карлсон, велејќи дека „вештачката интелигенција е поопасна од, на пример, погрешен дизајн на авион или одржување на производството или лошо производство на автомобили“ и дека има потенцијал да „ ја уништи цивилизацијата“.

Како пример, тој го наведе фактот дека екстремно развиената вештачка интелигенција може да пишува неверојатно добро и може да има потенцијал да манипулира со јавното мислење, рече шефот на Tesla, SpaceX и Twitter.

Маск беше ко-основач на OpenAI во 2015 година, но се повлече од раководните тела во 2018 година. Една година подоцна, тој рече дека го напуштил OpenAI затоа што сакал да се фокусира на Tesla и SpaceX и затоа што „Тесла се натпреваруваше за некои од истите луѓе како OpenAI и дека тој не се согласува со некои од работите што тимот на OpenAI сакаше да ги направи“.

Што се однесува до OpenAI, Microsoft  најави дополнителни инвестиции од повеќе милијарди долари на почетокот на годината, интензивирајќи ја конкуренцијата со Google и поттикнувајќи ја трката за привлекување средства за вештачка интелигенција во Силиконската долина.