Илон Маск: Светот има поголем проблем од глобалното затоплување

Западните земји продолжуваат да се фокусираат на погрешни приоритети, смета ко-основачот на Tesla Inc., и најбогат човек на светот.

Ако постои една работа околу која фановите и критичарите на Илон Маск се согласуваат, тоа е фактот што милијардерот е поборник за зачувување на животната средина. Маск ја ко-основаше Tesla Inc., компанија чијашто цел е да помогне во изградба на одржлив свет.

„Tesla сака да го заштити животот на Земјата, SpaceX да го прошири животот надвор од планетава“, кажа серискиот претприемач околу мисијата на своите две најпознати компании на 15 јули годинава.

Tesla со развојот на електричните возила го трансформира автомобилскиот сектор, редуцирајќи ги емисиите на ЦО2 од најмногу користениот начин на превоз во северната хемисфера.

Откако настана спојувањето помеѓу Tesla и SolarCity, уште една компанија што Маск ја формираше, производителот на електрични возила, исто така произведува и соларни панели.

Во 2021 година, Маск ја укина опцијата Tesla автомобилите да се купуваат со биткоин, откако еколошки активисти му укажаа на фактот дека се трошат големи количества електрична енергија при трансакциите со криптовалути.

Но, најбогатиот човек на светот смета дека постои еден друг проблем за човештвото, дури и побитен од глобалното затоплување. Тоа е намалувањето на светската популација, феномен којшто особено ги погодува земјите од северната хемисфера и Кина.

„Колапсот на популацијата поради ниските стапки на наталитет е многу поголем ризик за цивилизацијата одошто глобалното затоплување“, Маск напиша на Твитер на 26 август. И за да покаже дека е сериозен, додаде: „Запомнете ги овие зборови“.

Тој објасни и дека се’ уште смета оти глобалното затоплување е клучен проблем за планетава, но дека треба да разговараме за приоритети. Во основа, треба да ги редефинираме приоритетите и на врвот на листата да биде прашањето на популацијата.

Ова не е првпат Маск да го изнесе јавно овој проблем. Тој и претходно алармираше за депопулацијата на Јапонија, Јужна Кореа, Италија, Кина и Хонгконг. Исто така предупреди и на падот на наталитетот во САД и на други места.

Според ООН, глобалната популација треба да стигне до 8 милијарди жители на 15 ноември 2022. Пикот од околу 10,4 милијарди луѓе ќе се случи за време на 2080-те, и потоа светската популација ќе остане на тоа ниво до кај 2100 година.

Но Обединетите нации исто така излегоа со податок дека стапката на раѓање во 2021 била 2,3 деца по жена, споредено со 5 во 1950, и ќе биде 2,1 во 2050. Аналитичарите од банката HSBC излегоа со извештај дека овој пад на популацијата ќе биде уште поголем, особено поради подоброто интегрирање на жените на пазарот на труд, поскапувањето на недвижнините и поквалитетниот пристап до контрацепциска заштита.

Трендот на стареењето на светската популација исто така ќе се интензивира, предупредува HSBC. Според нивната студија, кривата на стапката на раѓање ќе се вкрсти со кривата на стапката на смртност некаде помеѓу 2080 и 2090 година. Затоа според нивното сценарио светската популација ќе се преполови за 80 години и ќе изнесува околу 4 милијарди луѓе во 2100 година.