Како веб апликацијата Lista стигна до инвестиција од Акцелераторот УКИМ

На пазарот се’ уште не постои алатка за брзо и евтино дизајнирање на продукт слики без дизајн способности. Lista е веб апликација креирана од стартапот Brander на Славе Ангелов,  која потекна од лоцирањето на тој недостаток на пазарот и неодамна доби понуда за инвестиција од Акцелераторот УКИМ. Со менторската поддршка што ја обезбеди Акцелераторот УКИМ, преку интерниот тим експерти и надворешните соработници – предавачи на акцелераторската програма, како и со првиот дел од инвестицијата од 25,000 од вкупно 100,000 евра, Lista е на пат до лансирање на своја бета верзија и тестирање на истата пред потенцијални клиенти.

Во 2021 Amazon.com достигна повеќе од 10 милиони регистрирани продавачи. Статистички, од сите регистрирани продавачи, само 2% успеваат да направат поврат на инвестицијата, а тоа обично се аквизициски е-комерц компании и познати светски компании со голем капитал. Сепак најголема конкуренција на овој пазар е самиот Amazon, кој откупува успешни мали бизниси или лансира производи со кои станува директна конкуренција на свој терен, на пазар чии правила го диктира самостојно и пресметано.

Ова принудува околу 9,8 милиони брендови, најчесто нови Amazon претприемачи кои брзо го горат својот почетен капитал, да бараат креативни и евтини начини за подобрување на конверзијата на нивните производи. Еден од тие начини е преку дизајн оптимизација на нивните продукт листинзи. Квалитетно дизајнираните продукт листинзи им помагаат на посетителите да го разберат производот, да се уверат во неговиот квалитет и уникатни карактеристики и да убедат луѓе дека на брендот може да му се верува. Со други зборови, добро дизајнираните листинзи од страна на дизајн агенции, од посетителите прават купувачи.

Агенциски дизајнираните листинзи исто така чинат многу пари, па не се опција за малите играчи на пазарот. Дизајн агенциите како Fliprise, кои ја имаат откриено Amazon формулата за успешна конверзија работат со поголеми аквизициски клиенти, а на пазарот се уште не постои алатка за брзо и евтино дизајнирање на продукт слики без дизајн способности.

Lista е веб апликација која потекна од лоцирањето на тој недостаток на пазарот и неодамна доби понуда за инвестиција од Акцелераторот УКИМ.

„Со неа продавачите и нивните виртуелни асистенти брзо и бесплатно можат да генерираат дизајнирани слики за нивните производи без да имаат дизајн вештини, користејќи темплејти во кои тие само внесуваат информации за производите како и фотографии од нив, а платформата истите ги конвертира во готови продукт слики спремни за користење, со можност за директна интеграција на Amazon. Дополнително, преку Lista тие ќе можат да се поврзат и со дизајнери, маркетери, копирајтери и други понудувачи на услуги кои се специјализираат во секакви Amazon услуги.“, објаснува Славе Ангелов, основач на стартапот Brander и креатор на апликацијата Lista.

Идеја добиена од искуството со Amazon клиенти

Идејата за оваа веб апликација потекна од шестгодишното искуство на Brander и Fliprise агенциите во работа со Amazon клиенти, анализирајќи ги нивните најголеми тешкотии во работењето, како и потенцијалот за намалување на нивните трошоци. При тестирањето на прототипот од апликацијата, 4 од 5 потенцијални корисници, виртуелни асистенти, побараа годишна претплата.

„Тие не беа единствени што го препознаа потенцијалот на Lista. Истиот потенцијал го препозна и Акцелераторот УКИМ, кој неодамна ја вклучи во неговата акцелераторска програма за стартапи, преку која Lista од прототип прерасна во финансиран план за акција, со своја маркетинг и продажна стратегија, петгодишна финансиска проекција и непробоен инвестициски pitch.“, додава Ангелов.

Со менторската поддршка што ја обезбеди Акцелераторот УКИМ, преку интерниот тим експерти и надворешните соработници – предавачи на акцелераторската програма, како и со првиот дел од инвестицијата од 25,000 од вкупно 100,000 евра, Lista е на пат до лансирање на своја бета верзија и тестирање на истата пред потенцијални клиенти.

Акцелераторот УКИМ ги претстави првите паметни инвестиции

Акцелераторот УКИМ во соработка со програмата Star Venture на ЕБОР ја спроведе Акцелераторската Програма Есен  2021 година (AПA2021), во која се вклучија реномирани локални, регионални и глобални експерти, а четири глобални успешни стартапи ги споделија своите приказни, успеси и неуспеси.

„Експертите со своето разновидно искуство и знаење обезбедија вредни перспективи за усовршување на учесниците во АПА2021 и ги подготвија за инвестирање и освојување на пазарот. Како резултат на оваа програма, Акцелераторот УКИМ ги претстави првите паметни инвестиции во решението Lista и во играта SciGirl: The Internship, и очекува да инвестира уште во неколку стартапи од учесниците во АПА2021“, истакна Александар Стамболиев, директор на Акцелератор УКИМ.

Ангелов од Brander смета дека во Северна Македонија се’ уште има мал број можности за добивање на стартап инвестиции, а тие што постојат обично се со многу помало ниво на почетна инвестиција споредбено со другите европски земји.

„Сепак, споредбено со истите тие земји, ние воопшто не заостануваме во поглед на квалитет и иновативни решенија, што беше заклучок на ЕБОР при анализирање на податоците собрани од нивните програми на Западен Балкан. Очигледна е потребата од носење на странски инвеститори и подобрување на домашната легислатива за ангел-инвеститори, како би се создале подобри услови и можности за создавање успешни стартап приказни, од кои бенефит би имале сите чинители во процесот.“