Како “Градот на светлината“  стана преку ноќ град на ѓубрето?

Француската престолнина деновиве е затрупана со купишта смет поради штрајкот на ѓубреџиите. Работниците од јавната комунална служба се придружија кон протестите на останатите работници, предизвикани од непопуларната реформа на пензискиот систем што ја турка администрацијата на претседателот Макрон. Работниците штрајкуваат затоа што владата предлага да се зголеми границата за пензионирање од 62 на 64 години.

Туристите кои сакаат да ја видат Ајфеловата кула од плоштадот Трокадеро, по излегувањето од метрото здогледуваат „ѕид“ од натрупано ѓубре, а на брегот на Сена купишта ѓубре го блокираат погледот кон катедралата Нотр-Дам. Во понеделникот, градските власти рекоа дека преку 6.000 тони отпад не се собрани.

Еден коментатор на радиото Europe1 ја опиша ситуацијата како идеална шведска маса за милионите глувци во Париз, а граѓаните се згрозени и од наездите на лебарки. Во 10-те дистрикти на градот што се покриени од приватни компании за собирање смет, работата тече речиси нормално, иако има извештаи и за обиди на активисти да ги попречат овие работници во собирањето на ѓубрето.