Конференција за недвижности во Скопје: Проектите не запираат, а ESG е новото „must have”

Градежните проекти нема да сопрат, иако може да се очекува нешто забавена динамика во побарувачката на станови и деловен простор, поради општата економска криза и инфлацијата.

Градежните проекти нема да сопрат, иако може да се очекува нешто забавена динамика во побарувачката на станови и деловен простор, поради општата економска криза и инфлацијата, беше потенцирано на денешната Конференција за комерцијални недвижности, прва од ваков вид во Македонија.

На панелот насловен „Финансирање на проекти“, претставници од банкарскиот сектор, осигурувањето, како и од самите градежни компании дискутираа околу моменталната динамика на инвестициските проекти во секторот недвижности  во земјава. Од банките рекоа дека остануваат посветени на тоа на потенцијалните корисници на нивните кредити да им помогнат во поквалитетно креирање на бизнис планови, со што би се избегнале евентуалните проблеми предизвикани од менување на економските услови, пазарни шокови, инфлација, итн.

Заклучокот беше дека не се чувствува некакво забележително намалување на побарувачката за кредити, како од страна на самите градежни компании, но и од крајните корисници на станбениот и деловниот простор, иако во наредниот период може да се очекува извесно успорување поради кризата.

Панелистите истакнаа и дека концептот на општествена одговорност, односно одржливост или ESG, станува се’ повеќе незаобиколен дел на инвестициските проекти во секторот недвижности. Или како што кажа еден од учесниците, компанија која не води сметка за аспектите на одржливост, се’ потешко или воопшто нема  да биде квалификувана за да добие финансирање од банките, ниту пак осигурителни и други услуги на пазарот.

На овој панел учествуваа Владо Бојаџиевски (Помошник директор, Виш банкар, ЕБРД СКОПЈЕ), Александар Тодоров (Директор, филијала за корпоративни клиенти, ПРОКРЕДИТ БАНКА), Игор Стојнев (Консултант, ЖИКОЛ Груп), Марија Томеска (Претседател на управен одбор, Еуролинк Осигурување), Елмедин Адеми (Извршен директор, ЕУРОВИА ГРУП), Кан Мемед (Директор на Дирекцијата за корпоративен маркетинг и проектно финансирање, ХАЛКБАНКА АД СКОПЈЕ).

Првата Конференција за комерцијални недвижности е иницирана и организирана од Фортонмка, македонска консултантска  компанија која на домашниот пазар за недвижности работи веќе 12 години. Коорганизатор е Кликер Маркетинг, а ексклузивен медиумски спонзор, Капитал.