Кој беше Шинзо Абе, поранешниот јапонски премиер убиен во атентат утрово

Додека беше премиер во 2006 и потоа од 2012 до 2020, Абе беше карактеристичен по агресивните политики во одбраната и меѓународните односи, и настојчивоста да се промени пацифистичкиот повоен устав на Јапонија. Исто така, тој форсираше економска политика базирана на монетарно олабавување, фискален стимул и структурни реформи, позната како „Абеномика“.

Поранешниот јапонски премиер Шинзо Абе починал во болница пред неколку часа, откако утрово беше застрелан за време на предизборен митинг.

Абе бил погоден два пати додека држел говор во јужниот јапонски град Нара. Обезбедувањето веднаш го совладало напаѓачот, 41-годишник којшто сега е во притвор.  Тој не пружил никаков отпор при апсењето, а пукал најверојатно со рачно изработен пиштол. Полицијата при претресот на неговиот дом наводно пронашла експлозивни средства, пренесуваат локалните медиуми.

Пред да биде официјално потврдена смртта на Абе, актуелниот премиер на земјата, Фумио Кишида го осуди нападот со зборовите дека е „варварски  и злобен чин и не смее да се толерира“.

Осомничениот е идентификуван како Тетсуја Јамагами, жител на Нара, за коишто локалните медиуми известуваат дека е поранешен припадник на јапонските сили на воената морнарица и дека активната служба ја напуштил во 2005 година.

Говорот на г-дин Абе бил во рамки на кампањата на неговата партија, Либерално-демократска, во пресрет на изборите за горниот дом на парламентот, коишто треба да се одржат викендов.

Шинзо Абе, беше познат како најдолгогодишен јапонски премиер, којшто функцијата ја извршуваше во 2006, околу една година, и потоа повторно од 2012 до 2020 година, кога се повлече од здравствени причини.

Додека беше премиер, карактеристичен беше по агресивните политики во одбраната и меѓународните односи, и настојчивоста да се промени пацифистичкиот повоен устав на Јапонија, како што коментира Би Би  Си.

Исто така, тој форсираше економска политика базирана на монетарно олабавување, фискален стимул и структурни реформи, позната како „Абеномика“. На позицијата премиер го наследи неговиот близок сопартиец Јошихиде Суга, кого што подоцна го замени актуелниот Фумио Кишида.