Маск продаде уште едно „пакетче“ акции од Тесла, за 3,6 милијарди долари

Иако штотуку продаде дополнителни 22 милиони акции, Маск и понатаму е најголемиот акционер на Тесла  со 13,4 отсто од акциите.

Де  најбогатиот, де  вториот најбогат  човек во светот, Илон Маск, продаде 22 милиони акции на Тесла  во вредност од 3,58 милијарди долари, според поднесената пријава до  американскиот финансиски регулатор. Ако ги собереме сите акции што ги продаде во текот на минатата и оваа година, ќе дојдеме до вредност од речиси 40 милијарди долари.

Иако штотуку продаде дополнителни 22 милиони акции, Маск и понатаму е најголемиот акционер на Тесла  со 13,4 отсто од акциите. Минатиот месец Маск откри дека продал 19,5 милиони акции на Тесла, тогаш вредни 3,95 милијарди долари, само неколку дена откако го заврши преземањето на социјалната мрежа Твитер за 44 милијарди долари.

Тесла е една од акциите со најлоши перформанси меѓу големите производители на автомобили и технолошки компании оваа година, поради стравувањата на инвеститорите дека Маск е премногу фокусиран на Твитер и дека новата аквизиција премногу му го одвлекува вниманието.

Тековната цена на акцијата на Тесла  на њујоршката  берза  падна под 500 долари за прв пат од 2020 година. Компанијата вредеше повеќе од 1000 милијарди долари на крајот на минатата година, но нејзината вредност падна во последните месеци.   Исто така, од продажбата на акциите на Тесла, Маск го финансираше купувањето на Твитер, што придонесе за пад на акциите на Тесла.

Инвеститорите  се загрижени и  дека побарувачката за електричните автомобили на компанијата би можела да забави бидејќи економијата слабее, повисоките трошоци за задолжување ги обесхрабруваат купувачите и другите компании ги зголемуваат своите понуди на електрични возила.

Поради сето горенаведено, Маск ја загуби позицијата на најбогат човек во светот оваа недела по остриот пад на вредноста на акциите на Тесла, а според Форбс и Блумберг, Бернард Арно, извршен директор на групацијата за луксузни стоки ЛВМХ, го  престигна на првото место. Сепак, не мора многу да го жалиме Илон,  бидејќи тој се уште тежи  околу 174 милијарди долари.