Димовски е магистер по географски науки, од 2017 година член на Инспекцискиот совет, надлежен за животна средина и заштита на здравјето.

Членот на Инспекцискиот совет надлежен за ресорот животна средина, Методија Димовски, е назначен за нов генерален секретар на Владата, пренесуваат повеќе домашни портали. Димовски е назначен на денешната седница на Владата, по оставката на досегашниот Мухамед Зеќири минатата недела, откако Јавното Обвинителство за организиран криминал донесе наредба за спроведување истражна постапка против него за злоупотреба на службената положба и овластување од чл. 353 ст. 5 в.в. ст. 3 в.в. ст. 1 од КЗ на РМ, за што му помогнале други двајца осомничени хрватски државјани. Зеќири од петокот е во притвор.

На денешната седница Владата прво го разреши Зеќири од генерален секретар на Владата, а потоа и Димовски од член на Инспекциски совет од областа на животна средина и заштита на здравје на луѓето каде работи од 2017 година.

По ова Димовски е именуван за генерален секретар на Владата.

Во неговата биографија објавена на вебсајтот на Инспекцискиот совет е наведено дека е член на од 3.8.2017 година. Роден е на 16.7.1966 година во Скопје.

Магистрирал во 1994 година, на Универзитетот во Белград, Србија, во областа на географските науки (физичка географија). Во повеќе од две – децениската професионална кариера, работел на повеќе работни и раководни места во јавната администрација на Република Македонија, во меѓународни организации и како независен консултант.

Пред две години Димовски се спомнуваше како автор на прирачник за примена на Законот за инспекциски надзор, во издание на „Академик“ кој потоа им се продавал на инспекторите низ државава за 2.400 денари. Од редовите на инспекторите имаше остра реакција дека е тоа класичен конфликт на интереси, додека самиот Димовски го демантираше тоа, велејќи дека добил хонорар за трудот, пријавен во УЈП и дека нема ништо со продажбата на прирачникот и приходите од неа.