Мизо: Костал Македонија ќе стане најважната локација на компанијата во Европа

„Годинава Костал Македонија ќе ја заврши со обрт од 100 милиони евра, а догодина се планираат 140 милиони евра. На глобално ниво Костал Македонија треба да стане главната локација во Европа за производство на системи за електрични и плагин хибридни возила.“, вели директорот на компанијата Виктор Мизо.

Цената на електричната енергија е драстично зголемена, што несомнено ќе влијае на работата на индустриските капацитети во земјата, вклучително и на Костал, но развојот на компанијата која деновиве навршува шест години од почнување со работа во зоната Косел, кај Охрид, продолжува според зацртаните планови кои предвидуваат фабриката во Македонија да ги прошири своите капацитети во уште еден град и да стане најважна локација во Европа во глобални рамки, каде ќе се произведуваат софистицирани делови за автомобилската индустрија.

Ова го изјави генералниот директор на Костал Македонија Виктор Мизо, за порталот OhridNews во очи шестата годишнина на компанијата, која е во топ 15 компании во земјата според остварениот извоз.

„Во нашиот случај, но и во случајот на најголемиот број од компаниите од автомобилската индустрија учеството на електричната енергија во производствениот процес бележи зголемување за 4,5 пати во однос на периодот пред само една година. Од таа гледна точка, иако компаниите од оваа индустрија не се толку зависни од цената на струјата како компаниите кои се од металуршкиот или енергетскиот сектор, важно е да се знае дека треба на еден или друг начин да  да се намали нејзиното влијание во однос на нашата профитабилност.“, смета Мизо.

Тој додава дека во Костал Македонија се преземаат многу мерки кои не се поврзани само со енергетската ефикасност на објектите, но потребно е да се поедностават процедурите за поставување фотоволтаици, да може полесно и поефикасно да се направи тоа, да нема лимит на јачината на фотоволтаиците инсталирани на кровните конструкции на објектите, но истовремено и да се дозволи можност за продажба на вишоците на струја на слободниот пазар, посебно за оние компании коишто се лоцирани во технолошко индустриските развојни зони.

„Во контекст на справување со енергетската криза, потребно е зголемување на продуктивноста и ефикасноста на самите компании, што подразбира и мерки на штедење и рационализација на работниот процес, како што се спојување на празници и викенди и оптимизација на процесите, со што се намалуваат трошоците“, додаде Мизо. Според него  е исклучително важно сега државата да го поддржи стопанството, за што се разговара на ниво на комори со владини претставници.

„Чекаме да видиме кои ќе бидат мерките на Владата за поддршка на индустријата, бидејќи гледаме дека до сега најголемиот број од мерките се за поддршка на крајните потрошувачи и домаќинствата и некои мали микро компании. Но, цената за големата индустрија е значително повисока во споредба со земјите во регионот каде што има регулирани цени на електрична енергија, што е неопходно и за нашата конкурентност на поширокиот европски пазар, но и за задржување на сите работни места, бидејќи ако се започне со затворање или намалување на обемот на работа тоа негативно ќе влијае. Дотолку повеќе што станува збор за обучен кадар кој доколку го испуштиме како фирми и држава, ќе имаме проблем, и за обврските на државата кон тој кадар од финансиска гледна точка, а истовремено е прашање дали тој кадар ќе остане тука.“рече Мизо за OhridNews.

Трет циклус на инвестиции, од 50 милиони евра

Одредени компании најавија отпуштање до 50% на вработените, што не е случај и со Костал, без оглед на тешката ситуација предизвикана на светскиот пазар од актуелната криза.

„Бидејќи струјата сепак кај нас не влијае толку на крајниот производ, во Костал нема да се случи намалување на бројот на вработени, ние дури и кога немаше целосно производство во Европа ги задржавме нашите вработени, бидејќи имаме многу вложено во тој кадар и тој е неопходен за наше работење и во иднина. Но, сигурен сум дека постојат компании кои на еден или друг начин ќе имаат негативно влијание од кризата, а не знам колкаво ќе биде тоа во проценти, не можам да коментирам“, истакна  Мизо.

Во моментов Костал во својата фабрика крај Охрид  вработува 1030 лица. Тој број до крајот на 2022 треба да порасне за 200 нови вработувања поради новите инвестициски проекти.

„Во наредните две години ќе навлеземе во нов, трет циклус на инвестиции, во вредност од 50 милиони евра, пред се’ за системи за енергетска електроника за Фолксваген групацијата, но и за дополнителни проекти за Мерцедес, што значи дека обемот на производството од тие неколку проекти од 2024 до 2030 година ќе биде над 1,1 милијарда евра во тој временски период.“ посочи Мизо.

Годинава Костал Македонија ќе ја заврши со обрт од 100 милиони евра, а догодина се планираат 140 милиони евра. На глобално ниво Костал Македонија треба да стане главната локација во Европа за производство на системи за електрични и плагин хибридни возила.

„Ова значи потврда и валоризација на се’ што сме направиле во изминатите шест години и начинот на кој сме се покажале во рамки на групацијата.”, додаде Мизо.