Мукаетов од бизнис конференција во Белград: Мораме да ги задржиме талентите во регионов!

Бизнис заедницата е еден од најбитните играчи во процесот на мотивација на луѓето да останат во регионов и да ја гледаат својата иднина овде, истакна Живко Мукаетов, директорот на Алкалоид, на бизнис конференцијата NLB Investor Day што денеска се одржува во Белград.

Дефинитивно најскапоцен ресурс се луѓето и треба да се бориме како општества да ги задржиме овде, во регионот, истакна директорот и претседател на УО на Алкалоид, Живко Мукаетов, на првиот Инвеститорски ден, конференција што денеска се одржува во Белград во организација на НЛБ Групацијата.

„Да се залагаме за промовирање на позитивни стории за да ги мотивираме квалитетните кадри да останат во регионов. Живееме во политизирани општества, дефинитивно треба да сме проактивни, поагресивни во промовирањето на добрите вредности. Не може да очекуваме премногу од некои сегменти од општествата, за жал, затоа мора и самиот бизнис сектор да се ангажира во некои процеси со цел создавање  стручен и мотивиран кадар, како што е дуалното образование, на пример. Ние како компанија стартуваме едукативен центар за потребите на нашиот бизнис развој, значи дефинитивно треба повеќе акција за да се мотивираат луѓето. Бизнис заедницата е еден од најбитните играчи во тој процес.“, истакна Мукаетов.

NLB Investor Day е настан на којшто се присутни финансиски експерти, аналитичари, извршни директори на клучните компании во регионот, медиуми и многу други кои ги пишуваат успешните приказни за овој регион. Конференцијата е  посветена  на макроекономскиот  преглед на регионот, неговата атрактивност како можност за инвестирање, стратегии за одржлива иднина, но и на работењето на НЛБ Групацијата.