„Навивачи“ колку сакаш: финансиер од Волстрит  вели дека биткоин ќе достигне 100.000 долари за една до две години

„Распродажбите“ на крипто пазарот продолжија и вчера  и денес, па сега во моментов цената на биткоин е уште пониска, околу 20.500 долари, а на етер околу 1.060 долари.

Силниот пад на биткоин деновиве е прилика за купување пред најпопуларната криптовалута да направи пресврт и да достигне и до 100 илјади долари следните 12-24 месеци , вели шефот на инвестициската куќа SkyBridge Capital, Ентони Скарамучи за CNBC.

Тој го кажа ова во понеделникот, кога биткоин потона 15% на 22.896 долари, што значи под 23.000 за првпат од декември 2020 наваму. Пазарната капитализација на биткоин се спушти под илјада милијарди долари за првпат од почетокот на 2021. „Распродажбите“ на крипто пазарот продолжија и вчера  и денес, па сега во моментов цената на биткоин е уште пониска, околу 20.500 долари, а на етер околу 1.060 долари.

“Со напливот на кеш што доаѓа  во нашите фондови, ние сега докупивме биткоин и етереум. Имаме удел и во FTX (менувачница за криптовалути со седиште на Бахами, н.з.) којашто работи добро, зголемува пазарен удел и е профитабилна компанија“, рече Скарамучи.

Според него оние што се паметни, среде овој дебакл на крипто  – пазарот ќе си купат крипто средства и „уште ќе прашаат дали има уште“.

Биткоин инаку падна за повеќе од 50% во 2022 досега, додека етер, токенот на ертереум блокчејн платформата, загуби речиси 70% од вредноста од први јануари наваму.

Цените на крипто пазарот практично го следат трендот на она што се случува кај акциите на светските берзи, коишто се урнисани поради инфлацијата и зголемените каматни стапки.

Скарамучи, којшто, патем, стана познат за пошироката јавност во 2017 година, кога едвај десетина дена ја извршуваше функцијата директор за комуникации на Белата куќа, вели дека е „невозможно да се предвиди колку ниско може да паднат сега биткоин и етер“.

„Но, ако бевте присутни на конференцијата за крипто Consesus минатата недела (организирана од CoinDesk, информативен портал за крипто средства, н.з.) и слушневте за целиот тој силен развој што се случува на Web3  и парите коишто се влезени таму, мислам дека потенцијалот е огромен“, вели тој. “Се уште верувам дека биткоин лесно може да се качи до 100.000 долари следниве 12 до 24 месеци, но ќе мора да се навикнете на флуктуациите.“

Скарамучи додава дека инвестициските банки веќе влегоа во светот на криптовалутите, нудат разни финансиски инструменти и сл., и дека нештата нема да се враќаат назад.

„Многу добри вести доаѓаат од секторот, многу позитивни промени. Само што сега цената падна ужасно.“