Ништо не ги колеба туристите од ЕУ да одат на одмор летово: Медитеранот руши рекорди со број на посети

Грција бележи невиден промет на островите, Шпанија исто како и Хрватска пополека ја стигнува рекордната 2019-та, додека Турција привлекува огромен број на германски туристи.

Ниту поскапувањата, ниту растот на ковид случаите,  ниту хаосот по аеродромите, ниту пак црните економски прогнози за есенва, ништо засега не ги поматува плановите на европските граѓани да одат на својот летен одмор, ако се суди според статистиките што доаѓаат од познатите летувалишта на Медитеранот.  Како што пишува хрватски Пословни дневник, Грција бележи невиден промет на островите, Шпанија исто како и Хрватска пополека ја стигнува рекордната 2019-та, додека Турција привлекува огромен број на германски туристи.

Меѓународните пристигнувања на популарните грчки острови Родос, Кос, Санторини, Миконос и останатите, ги надминаа нивоата од пред пандемијата во првите 10 дена на јули за 25%, објави Јужноегејската туристичка иницијатива (SATI).

Познатото турско летувалиште Анталија, пак, до крајот на првата седмица од јули примило повеќе од еден милион германски туристи, и тоа е за првпат Германците да ги престигнат по бројност руските туристи, традиционално најбројни во Турција.

Доколку не се случи некоја вонредна ситуација околу пандемијата, од најсилната турска туристичка регија планираат да ги гостат германските туристи до ноември – според проценките таму оваа година ќе одмораат три милиони Германци, првпат после 2015 година, кога дојдоа најголем број германски туристи во историјата, 2,9 милиони.

И шпанското туристичко лудило потврдува дека европските граѓани засега ги спроведуваат своите планови за одмор. Здружението на туристичката индустрија Exceltur предвидува дека секторот во 2022 ќе има приходи од 152 милијарди евра, што е речиси исто како и во 2019.

Во Хрватска, нивната централна банка сигнализира дека домашниот туристички сектор годинава би можел да се опорави до ниво пред пандемијата. За илустрација, во првата седмица на јули цела Хрватска бележи речиси исти бројки како и пред пандемијата, односно само 3% помалку ноќевања.