Оптимизам: JP Morgan предвидува крај на пандемијата и силна економија во 2022 година

Новите вакцини и лекови што очекува банката да бидат достапни догодина ќе доведат до „силно циклично закрепнување, враќање на глобалната мобилност и заживување на потрошувачката“.

Американската инвестициска банка J.P. Morgan е многу оптимистична во врска со состојбата на светската економија во 2022 година. Во својот извештај наведуваат дека следната година би можел да се постави темелот за далеку подинамично окружување што би требало да настапи откако Ковид-19 од пандемија ќе премине во ендемска болест.

Извештајот на банката наведува дека следната година ќе го видиме крајот на пандемијата  и конечно ќе се вратиме на нормални економски и пазарни услови. Главниот индекс на американскиот пазар на капитал, S&P 500 ќе порасне за 8%, додека пазарите во развој ќе пораснат и до одлични 18%.

„Нашата прогноза е дека 2022 ќе биде година на целосно глобално закрепнување“, вели Марко Колановиќ, главен стратег за глобални пазари во J.P. Morgan, во обраќањето до клиентите на банката деновиве.  „Тоа го темелиме на фактот што ќе се постигне широко распространет имунитет на вирусот, како и со новите лекови за третман на ковид што се очекуваат во 2022.“

Новите вакцини и лекови што очекува банката да бидат достапни догодина ќе доведат до „силно циклично закрепнување, враќање на глобалната мобилност и заживување на потрошувачката“.

Ковид-19 ќе остане да егзистира до извесно ниво да стане ендемски, велат авторите на извештајот, додека ризиците од инфекцијата ќе станат значително намалени.

Иако поедини економисти предвидуваат рекордна инфлација и проблеми во светските логистички синџири и во 2022, во J.P. Morgan не се секираат премногу околу тоа.

„На среден рок очекуваме глобалната економија да работи на решение на проблемите што се појавија во 2021. Како што ќе бледнее пандемијата, потрошувачите ќе ја пренасочат побарувачка од добра кон услуги. Тесните грла во синџирите на набавка пополека ќе се измазнат и глобализацијата ќе продолжи да ги одредува цените на стоките, како што и беше изминативе две децении“, пишува во извештајот на J.P. Morgan.