Падна договор: минималната плата ќе биде 18.000 денари

Минималната плата во Македонија се крева од 15.200 на 18.000 денари, се договорија Владата, синдикатите и работодавците. Ќе опфати околу 80.000 вработени во неколку индустрии, а државата ќе субвенционира во делот на покачените социјални придонеси со 16 милиони евра, до крајот на годинава.

Премиерот Димитар Ковачевски објави дека е постигнат договор со Сојузот на синдикати и со работодавачите за минимална плата од најмалку 18.000 денари.

Како што рече Ковачевски 80.000 сограѓани, работници во различни индустрии, почнувајќи од мартовската плата ќе земаат најмалку 18.000 денари.

„Среќен сум и задоволен што можам да соопштам дека постигнавме договор и со Сојузот на синдикати и со работодавачите. 80.000 наши сограѓани, работници во различни индустрии, почнувајќи од мартовската плата ќе земаат најмалку 18.000 денари“, рече премиерот Ковачевски.

Оваа сума, како што рече, означува раст на нето платата на овие работници за околу 45 евра месечно.

„Ветивме и реализираме мерки кои директно го помагаат животниот стандард. Во исклучително кризна година, година на европски и светски кризи, остануваме фокусирани на финансиска поддршка на граѓаните“, рече Ковачевски.

Ковачевски по Социо- економскиот совет во Владата меѓу владиниот кабинет, работодавачите и синдикалците рече дека за таа намена ќе бидат издвоени 48 милиони евра.

Претседателот на ССМ, Дарко Димовски, по завршувањето на преговорите со Владата и работодавачите, рече дека е презадоволен што е постигнат договор за минимална плата во износ од 62% од просечната плата.

„И не е само оваа придобивка денеска. Ќе добиеме и доследна примена на членот 8 од Законот за минимална плата, каде што се вели дека сите останати плати согласно законските коефициенти и колективните договори ќе се зголемат. Значи, придобивката од денешните преговори не е само зголемување на минималната плата, туку и зголемување на сите останати плати согласно колективните договори и законите. “, рече Димовски.