Паметни градови: преку технологија до подобар живот

Според проценките на ОН, до 2050 година, преку 68% од светската популација ќе живее во големи градови, што придонесува за зголемено загадување на воздухот и неекономично трошење на ресурсите. Како одговор на овие модерни предизвици, а со помош на технологијата, создаден е концептот на паметни градови.

Паметните градови се дигитализирани поврзани градови коишто имаат за цел да ги оптимизираат ресурсите, да придонесат кон здрава и одржлива околина и да го унапредат урбаното живеење. Начинот на кој еден град станува паметен е преку менување и подобрување на целосниот еко-систем, почнувајќи од институционалната, преку физичката и социјалната, па сè до економската инфраструктура.

Паметни градови во Македонија

За развојот на паметни градови потребна е врвна инфраструктура и најсовремена технологија. Тие се базирани на платформа на која може да се додаваат нови решенија и апликации. Македонски Телеком досега ја имплементираше оваа технологија во Скопје, а паметно осветлување беше обезбедено во четири помали општини во Македонија, со план за постојано ширење. Развојот на паметните градови е најдобар пример за тоа како технологијата се користи за подобар живот на граѓаните. Придобивките се многубројни, како на пример: заштеда на електрична енергија и трошоци за осветлување, подобра инфраструктура, ефикасно управување со трошоци и ресурси, следење во реално време, побезбедни улици, регулиран сообраќај и паркирање, намалување на емисијата на штетни гасови итн.

Интернет на нештата

Клучната технологија за создавање паметен град е „Интернет на нештата“ (Internet of Things). Со помош на оваа технологија се создава платформа на која се поставуваат сите функционалности и апликации за паметен град. Штом ќе се постави, платформата нуди голем потенцијал и многу можности. Трендовите на IoT сугерираат дека до 2025 година бројот на поврзани уреди ширум светот ќе се зголеми на 75 милијарди, што ќе го надгради концептот на „Паметно живеење“ каков што го знаеме досега. 

5G ќе го отклучи потенцијалот на паметните градови

Со доаѓањето на мрежата на петтата генерација, паметните градови ќе го достигнат својот вистински потенцијал. Со оглед на тоа што 5G ќе овозможи развој на Интернет на нештата, технологија на која се темелат паметните градови, овие две технологии ќе бидат постојано поврзани. Последниот мрежен стандард од петтата генерација е веќе тука; Македонски Телеком покри поголем дел од градовите, а во 2022 година се очекуваат и првите 5G услуги. 5G ќе овозможи информациите да се пренесуваат и следат во реално време, со што подобро ќе се одржува инфраструктурата и ќе може веднаш да се реагира штом ќе се појават предизвици. Исто така, ќе се зголеми бројот на паметни сензори затоа што 5G овозможува огромен број на поврзани сензори коишто комуницираат без притоа нивниот број да влијае врз брзината или латенцијата.

Алатка за борбата против климатските промени Освен што ќе продонесе за вистински развој на паметните градови, 5G, заедно со паметните сензори, Cloudтехнологијата и Вештачката интелигенција, ќе влијаат во насока на намалување на емитувањето на штетните гасови, на енергетска ефикасност, ефикасно користење на природните ресурси, подобрување на производството на храна, обновување на  биодиверзитетот и др. Овие технологии ќе бидат алатка што ќе ни помогне во борбата со климатските промени и ќе ни овозможи да живееме во самоодржливи средини во хармонија со природата.