Почина Колин Пауел, првиот афроамериканец државен секретар на САД

Неговиот мандат како државен секретар беше многу контроверзен поради неточното оправдување на причините за воената инвазија врз Ирак во 2003 година. Беше принуден да поднесе оставка откако Буш беше реизбран на функцијата во 2004 година. 

Колин Пауел, првиот Афроамериканец државен секретар на САД и висок воен офицер, почина од компликации од ковид-19 на 84 години, соопшти неговото семејство, објави „Ројтерс“.

„Тој беше целосно вакциниран. Изгубивме прекрасен сопруг, татко, дедо и голем Американец“, напиша семејството на Пауел на неговата Фејсбук страница.

Армиски генерал со четири ѕвезди тој беше претседател на Генералниот штаб во времето на Џорџ Буш постариот. Како умерен републиканец и прагматичар тој беше државен секретар на САД за време на администрацијата на Џорџ Буш.

Пауел служеше и како национален советник за безбедност, а четири години беше на чело на Генералштабот на американската армија. 

Роден во Њујорк во 1937, син на имигранти од Јамајка, Пауел ја почнал кариерата како професионален војник и за 35 години стигнал до рангот на генерал со 4 ѕвездички. Во Армијата надгледувал 28 светски кризи и настани, меѓу нив инвазијата врз Панама во 1989 и операцијата Пустинска бура против Ирак во 1990-1991.

Неговиот мандат како државен секретар беше многу контроверзен поради неточното оправдување на причините за воената инвазија врз Ирак во 2003 година. Беше принуден да поднесе оставка откако Буш беше реизбран на функцијата во 2004 година. 

Во април 2001 година, како државен секретар Пауел ја посети Македонија и разговараше со тогашниот државен врв во екот на воената криза.