По Ролс Ројс, и Бентли објави рекордна продажба во 2022 година

Цените на ново Бентли возило почнуваат од околу 170 илјади долари па нагоре, додека Ролс Ројс е нешто поскап, односно околу 250 илјади долари чини најевтиниот модел.

Веднаш по вчерашната објава за рекордна продажба на возила Ролс Ројс минатата година, и неговиот конкурент Бентли се огласи денеска со извонредни бројки за 2022 година, односно продадени 15.174 луксузни автомобили.

Тоа е за 4% повеќе одошто во 2021 година и е најмногу предизвикано од рекордната побарувачка, претежно во САД, Европа и Азија.

Вчера, Ролс Ројс соопшти дека лани продале 6.021 возило, рекорд на компанијата на сите времиња, што е за 8% повеќе од 2021. Бентли пак, објасни дека нивните одлични бројки се должат на популарноста на новите модели, хибридните модели, како и персонализираните автомобили.

„Зад нас е уште една година на непредвидливост, кога успеавме да надминеме големи предизвици и да покажеме силна издржливост испорачувајќи трета година по ред рекорден број возила“, изјави Адриен Холмарк, главен извршен директор на Бентли, англиска компанија создадена во 1919 година, сега во сопственост на германската групација Фолксваген.

Последниве години  Бентли ги претстави хибридните  модели Flying Spur и Bentayga, со што го покажа правецот во којшто ќе се движи развојот на компанијата. До 2030 година, кога во В. Британија ќе престанат да се продаваат нови возила со дизел и бензински мотори, Бентли планира да произведува исклучиво возила со нула јаглеродни емисии.

Цените на ново Бентли возило почнуваат од околу 170 илјади долари па нагоре, додека Ролс Ројс е нешто поскап, односно околу 250 илјади долари чини најевтиниот модел. Меѓутоа, просечната цена на продадените Ролс Ројс лимузини минатата година била вртоглави 534.000 долари, првенствено поради програмата на возила направени по нарачка и посебни додатоци, наречена Bespoke.