Прв извоз на „Витаминка“ во Јапонија

Јапонските потрошувачи за почеток ќе се насладуваат со карамел бисквитот произведен во прилепската фабрика за прехранбени производи. Витаминка извезува во преку 30 земји во моментов. 

Фабриката за прехранбени производи „Витаминка“ од Прилеп го реализираше првиот директен извоз во Јапонија, јавија од компанијата. Пласманот на производите на „Витаминка“ на јапонскиот пазар следи по детално направено истражување на локалните пазарни специфики, присутната конкуренцијата и прехранбените навики и многубројните остварени средби со партнери од Јапонија ширум саемите во светот, реализирани пред корона кризата.

Моментално „Витаминка“ има континуиран извоз во повеќе од 30 земји, а со вклучување на јапонски пазар, кој е исклучително софистициран и пребирлив, реализацијата на странските пазари го продолжува трендот на зголемување и кон најдалечните дестинации.

 „Извезуваме во многу земји, со различни културни и прехранбени навики и различна структура на малопродажната индустрија од аспект на концентрација и формати, но извозот во Јапонија е посебно значаен затоа што овој пазар се издвојува со својот обем, високите квалитативни стандарди и многу различни и специфични нутритивни навики до кои успеавме да ги доближиме нашите производи“, вели Љупчо Велески, директор на Сектор извоз во „Витаминка“.

Тој додава дека продорот што го направиле во „земјата на изгрејсонцето“ е резултат, пред се’ на квалитетот на нивните  производи, како и извозната стратегија што ја развиваат континуирано и што дава позитивни резултати.
Компанијата го испорача првиот контејнер на „Карамел бисквит“, со нивен  оригинален бренд, но со адаптации на јапонските стандарди.

„Во фаза сме на подготовка и на нови артикли за тој пазар. Задоволството од довербата што ни ја даваат партнерите од таква далечна дестинација во вакви кризни времиња е непроценлива сатисфакција за Витаминка”, вели Велески.

Извозот на Витаминка во Јапонија е поздравен и од Амбасадата на Јапонија во Македонија, со желби за долгорочна соработка и наклонетост на тамошните потрошувачи.

„Витаминка“, инаку, во првите шест месеци од годинава има зголемени приходи од продажба на своите производи за 6%, и тие изнесуваат речиси 1,2 милијарди денари, или 19,4 милиони евра. Резултатот е до толку позначаен, што е остварен во период на разорните ефекти од пандемијата на коронавирусот, кога неколку месеци беа отежнати условите за продажба, транспорт и дистрибуција на прехранбените производи. Од вкупното производство, „Витаминка“ 36% извезува во моментов, и во однос на приходите од пласманот на странски пазари во истиот период лани, не е забележана промена, додека на домашниот пазар продажбата е зголемена за 10%.