Преку 300 западни компании ја напуштија Русија досега

Некои брендови, како Apple, ги затвориле сите продавници во Русија, други, како DHL и eBay ги прекинале испораките на пратки до земјата, нафтениот гигант Exxon го прекинал партнерството со Роснефт, додека Hyundai престанал со производство на автомобили во тамошните фабрики.

Откако почна инвазијата на Путин врз Украина, преку 300 меѓународни компании објавија дека се повлекуваат од рускиот пазар,  според податоците на Школата за менаџмент при Јејл универзитетот во САД, којашто секојдневно ги следи активностите на западните бизниси присутни на рускиот пазар и ја ажурира листата. Некои брендови, како Apple, ги затвориле сите продавници во Русија, други, како DHL и eBay ги прекинале испораките на пратки до земјата, нафтениот гигант Exxon го прекинал партнерството со Роснефт, додека Hyundai престанал со производство на автомобили во тамошните фабрики.

На листата од овие 300 компании што на некаков начин ги прекинале операциите во Русија се познати светски брендови од речиси сите бизнис сектори, меѓу кои и American Express, Amazon, Bloomberg, Disney, Ford, Heineken, Microsoft, Nike, Oracle, Panasonic и многу други.

Јејл ги следи и компаниите што досега не престанале со своите операции во Русија, изложувајќи ги на тој начин на јавна критика, по што и некои од нив потоа објавуваат дека ја бојкотираат Русија. Со секој нов ден се’ помал е списокот на западни фирми што се’ уште имаат бизнис операции во Русија. До овој момент меѓу тие што се’ уште работат во Русија од попознатите брендови се Citibank, Marriott, Dunkin Donuts, Pirelli, Burger King, итн.