Развојната банка со зголемено кредитирање и добивка во првото полугодие

Во првата половина од годината, РБСМ ги повлече последните три транши од ЕИБ 6 кредитната линија во износ од 40,8 милиони евра, со тоа што сите 100 милиони евра од оваа кредитна линија се веќе ставени во функција на поддршка на малите и средни компании.

Развојната банка на Северна Македонија (РБСМ) во првата половина годинава има нето добивка од 45 милиони денари (732 илјади евра), што е речиси двојно повеќе во однос на остварениот резултат во истиот период лани.
Финансискиот резултат на РБСМ покажува дека вкупната актива на Банката е зголемена за 43% и изнесува 16,4 милијарди денари, со соодветен раст на кредитното портфолио од 54%, и на изложеноста по основ на факторинг услугата од 200%.

Во првата половина од годината, РБСМ ги повлече последните три транши од ЕИБ 6 кредитната линија во износ од 40,8 милиони евра, со тоа што сите 100 милиони евра од оваа кредитна линија се веќе ставени во функција на поддршка на малите и средни компании. Паралелно, Банката воведе нови кредитни линии и ги олесни условите на кредитната линија за агросектор.

„Во услови на закрепнување на домашното стопанство од здравствената и енергетската криза, активностите на Банката оваа година се во знакот на поддршка на деловните субјекти во насока на намалување на последиците  од економската и енергетската криза предизвикана од геополитичките случувања, со цел, полесен пристап до ликвидни средства. Во следниот период, РБСМ и понатаму целосно ќе им остане на располагање на компаниите во соочување со актуелните предизвици од економска и неекономска природа, со што целосно ќе остане фокусирана на остварување на нејзината улога како развојна банка.“, велат од Развојната банка.