Распродадени летовите од Москва откако Путин нареди делумна мобилизација

Директните летови од Москва за Истанбул во Турција и Ереван во Ерменија, дестинации каде што Русите може да патуваат без виза, веќе се распродадени.

Рускиот претседател Владимир Путин рано утрово ѝ се обрати на нацијата и рече дека Западот сака да ја уништи Русија, и дека во моментов клучниот предизвик е одбрана на Русија и териториите на Донбас. Нареди делумна мобилизација што опфаќа 300 илјади резервисти и  којашто почнува денеска.

Рускиот министер за одбрана Сергеј Шојгу рече дека повикот ќе биде ограничен на оние со воено искуство и дека студентите и оние што само отслужиле воен рок нема да бидат повикани.

Веднаш по овие објави утрово, почнаа забрзано да се продаваат картите за авионските летови од Русија, односно, податоците на Google Trends покажуваат голем скок во пребарувањата кај Aviasales, најпопуларната руска веб страница за купување авионски карти. Според податоци од оваа платформа, директните летови од Москва за Истанбул во Турција и Ереван во Ерменија, дестинации каде што Русите може да патуваат без виза, веќе се распродадени.

Некои линии со трансфер, вклучително и оние од Москва до Тбилиси, Грузија, исто така не се повеќе достапни, додека најевтините летови од руската метропола до Дубаи чинат повеќе од 300.000 рубљи (околу 5.000 евра), што е неколкумесечна просечна плата во Русија.

Портпаролот на Кремљ одби да одговори на прашањата околу евентуалното затворање на руските граници за да се спречи бегство на воено способните лица откако е објавена делумната мобилизација за потребите на војната во Украина.

Украина тврди дека досега се убиени преку 55.000 руски војници, односно дека само во последните 24 часа загинале повеќе од 300, додека официјална Москва признава дека досега во војната загубиле помалку од 6.000 војници.