Сашо Дуљанов: Дали правиме сè што е потребно за успех на еден производ!

70% од нашите одлуки за купување се емотивни наместо рационални. Приказните им се привлечни на нашите емоции, а знаеме дека раскажувањето како некој производ решил некоја „болка“ има многу поголемо влијание наместо суви податоци или класична реклама.  А луѓето доколку се идентификуваат со туѓите искуства во приказната, тие веќе се чувствуваат како дел од неа. Науката за нервниот систем вели дека приказните ги помниме и остануваат во нашите мисли и се за 20% помоќни во инспирирањето и поттикнувањето на луѓето наспроти било која друга форма на комуникација.

Денес луѓето не купуваат производи, туку ја купуваат идејата која е зад тој производ. Ја купуваат приказната за тој производ, што тој овозможува, како помага!

Имате производ кој сте го креирале, резултат на вашата силна претприемачка страст, на вашата визија, нешто свое на што сте посебно горди. Сте го пласирале на пазарот, сте вложиле се што имате во него, и сега очекувате тој да успее, да биде прифатен и користен од целната група. Очекувате приходи и потврда од сите страни за она што сте го направиле!

Но реалноста за повеќето претприемачи, посебно стартапи или мали компании кои вовеле некоја иновација не е баш поволна, па следи разочарување и еден куп прашања на кои немате одговор. Природно се активира нашиот одбранбен механизам дека проблемот е на другата страна, дека пазарот не е спремен, дека луѓето се ограничени, дека државата не не’ поддржува, економската криза, пандемијата, и лошата политика во државата. Секако некои од овие фактори се важни и пресудни за нечиј неуспех. Но дали сме направиле се за производот да успее! Еден од најважните сегменти за производот да успее на пазарот е негова промоција, посебно ова важи за сите  мали и средно големи компании кои вовеле нов производ или услуга, за стартапи и други компании кои се чувствуваат спречени, ограничени во сопствениот развој.

Го имаат производот или услугата но неговиот продажен потенцијал не е искористен. Дел од нив се ограничуваат само на домашниот пазар, заборавајќи дека денес благодарение на дигиталниот свет можноста да се види она што го имаме е достапна за сите, за цел свет.

Морате да бидете видливи за целната група

Иако постојат исклучоци, па ќе сретнеме информација за интернационален успех на некоја наша компанија, генералната перцепција  е дека тоа поретко се случува. Моите анализи и согледувања ми покажуваат дека една (потенцирам само една) од главните причина за ова е невидливоста на нивните производи, услуги или решенија за јавноста, за целната група.

Голем број од овие компании имаат многу интересни и иновативни производи, за кои сигурно треба да постои интерес, но тие го немаат завршниот чекор за да го затворат 4П Котлеровиот маркетинг процес, одамна етаблиран во овој високо конкурентен светски економски поредок.  Овие компании немаат изградена, структурирана и релевантна комуникација со својата целна група, како домашна, така и интернационална.

Срамежливо настапуваат во својата комуникација, сметајќи дека преку лични контакти можат да воспостават релации и да го пласираат, продадат својот производ. Немаат, или недоволно ги користат сопствените медиуми (веб страната им е неажурирана, немаат содржина на Фејсбук, Инстаграм, Линкедин) немаат креирано автентична приказна. Тоа  што им е во глава за нивниот производ мислат дека сите го разбираат и дека го знаат и дека тие сега не треба нешто посебно да се трудат да направат.

Но, баш напротив, сега нивниот напор треба да биде уште поголем, да дефинираат кои се главните бенефити од нивниот производ, за кого е наменет, како тој производ ќе помогне. Треба да информираат, да едуцираат на еден разбирлив и ефективен начин, за таа информација да влезе во потсвеста на луѓето. Денес маркетинг и ПР комуникацијата базираат на чиста психологија. Комуникацијата треба да понуди јасни и корисни информации, кои другата страна (целната група) кога ќе ги прими ќе добие впечаток дека со тој производ нешто ќе добие. Денес луѓето не купуваат производи, туку ја купуваат идејата која е зад тој производ. Ја купуваат приказната за тој производ, што тој овозможува, како помага! Токму затоа „Односите со јавноста“ се толку влијателни и ефикасни, а ниеден друг формат ја нема таа моќ. Со ефикасна стратегија и правилна и оптимална имплементација „Односите со јавноста“ менуваат навики, креираат потреба, создаваат нова или изменета перцепција.

Живееме во динамично време кога треба да се биде активен, отворен за комуникација и транспарентен. Секоја неактивност е контрапродуктивна, и нанесува само штета на се досега што сме направиле.

Некои компании се пасивни поради страв дека не можат тоа самите да го направат, други од недостаток на чувство за потреба тоа да го дадат на професионалци, експерти за комуникација.  А, во суштината градењето на релевантна комуникација е многу едноставен процес.

Приказна наместо суви податоци или класична реклама

За почеток треба да се охрабриме и да почнеме со првиот чекор!

Да видиме која е нашата целна група, каде е таа во земјава, во странство, какви се нејзините карактеристики. Потоа да креираме клучна комуникација според нивните потреби, нивните очекувања. Содржината која ќе се креира треба да создава доверба, да биде автентична, дискретна, да поттикнува дијалог и интерес, да едуцира! Никој не го знае подобро производот од оној кој го креирал. Можеби е само потребна помош заедно со експерт за комуникации, тоа подобро да се структурира и прецизира. Потоа се одредуваат каналите за комуникација, форматите кои нашата целна група ги преферира, и содржината се пласира. Доколку се обезбеди конзистентност во пораката и континуитет во активностите, ја зголемуваме веројатноста за развој, и  ја отвораме портата на успехот.

Никој не може ништо да гарантира, но едно е сигурно –  ако не ризикуваме, ако не сме активни, тогаш не создаваме шанси!

Денес во услови кога буквално се’ е измислено, многу е тешко да се создаде  производ кој е единствен на пазарот, кој нема конкуренција или пак во најмала рака нема супститут во својата категорија. Така што потребата од активна и релевантна комуникација е уште позначајна. Се’ сме направиле,  да го направиме и последниот чекор! 70% од нашите одлуки за купување се емотивни наместо рационални. Приказните им се привлечни на нашите емоции, а знаеме дека раскажувањето како некој производ решил некоја „болка“ има многу поголемо влијание наместо суви податоци или класична реклама.  А луѓето доколку се идентификуваат со туѓите искуства во приказната, тие веќе се чувствуваат како дел од неа. Науката за нервниот систем вели дека приказните ги помниме и остануваат во нашите мисли и се за 20% помоќни во инспирирањето и поттикнувањето на луѓето наспроти било која друга форма на комуникација.