Светска банка го откажа објавувањето на „Дуинг бизнис“ – омилениот извештај на Груевски

Поранешната извршна директорка на Светска банка, сега прв човек на ММФ, Кристалина Георгиева, наводно вршела притисок да се подобрат рангирањата на Кина и некои други земји.

Светската банка го откажа објавувањето на својот познат извештај  „Дуинг бизнис“ (Doing Business) којшто ја оценуваше бизнис климата на земјите во светот, откако внатрешната истрага покажала дека членови на високото раководство на Банката вршеле притисок врз изработувачите на извештајот да менуваат податоци што влијаат врз рангирањето на Кина и некои други земји.

Во редот на раководителите се и поранешната извршна директорка на Светската банка, Кристалина Георгиева, којашто сега е директор на Меѓународниот монетарен фонд, како и тогашниот претседател на Светска банка, Џим Јонг Ким.

Ова е репутациски удар за Георгиева, како што пишува Волстрит Џурнал, којашто не се согласува со заклучоците на истрагата.

Светската банка ги објави резултатите од истрагата, каде што се заклучува дека топ менаџментот, вклучително и Георгиева, бил вклучен во притисок врз економистите да го подобрат рангирањето на Кина во 2018 година. Тогаш, таа и останатите раководители на банката се обидувале да ја убедат Кина да го поддржи напорот за зголемено финансирање на Светска банка.

Георгиева изјави: „Не се согласувам во целост со наодите и толкувањата на истрагата, коишто се поврзани со мојата улога во ‘Дуинг бизнис’  извештајот за 2018 година.“

„Одиме напред, ќе работиме на нов пристап за проценка на деловната и инвестициската клима. Ние сме длабоко благодарни на напорите на многуте членови на персоналот кои работеа вредно за да ја унапредат агендата за деловна клима и со нетрпение очекуваме да ги искористиме нивните енергии и способности на нови начини“, најавуваат од Светска банка.  

Извештајот „Дуинг бизнис“ на Светска банка беше еден од главните елементи во кампањите на поранешниот премиер и лидер на ВМРО-ДПМНЕ, Никола Груевски, кој се користеше како еден од главните адути за да се придобијат гласовите на  гласачите, но се користеше и како мамка за странските инвеститори, како што пишува Дојче Веле.

Овој извештај голем број земји, како и Македонија,  го користеа за да ги покажат компаративните предности за водење бизнис во нивните во однос на други земји.   

Покрај спорните извештаи коишто ги споменува Светска банка, проверки биле вршени и на извештаите во изминатите пет години, кога земјава  можеше да се пофали со добри резултати. Па така, на пример извештајот на „Doing Business“ во 2015 година ја рангираше Македонија највисоко во регионот. Земјата беше на 12-то место глобално рангирана од 189 економии во светот.