Следниве 12 месеци скоро сите развиени економии ќе влезат во рецесија, прогнозира јапонска инвестициска куќа

Освен во САД, од Nomura Holdings очекуваат рецесија и во еврозоната, В.Британија, Јапонија, Јужна Кореа, Австралија и Канада следната година.

Многу од светските водечки економии ќе паднат во рецесија следниве 12 месеци, поради тоа што централните банки агресивно ја затегаат монетарната политика заради за да ја зауздат инфлацијата, тврди главниот економист на јапонскиот финансиски холдинг Nomura.

“Во моментов голем дел од централните банки се фокусирани на една цел – како да се скроти инфлацијата. Кредибилитетот на монетарната политика е премногу скапоцен за да се загуби. И затоа тие ќе бидат многу агресивни.“, вели Роб Субараман за CNBC.

Освен во САД, од Nomura очекуваат рецесија и во еврозоната, В.Британија, Јапонија, Јужна Кореа, Австралија и Канада следната година.

“Централните банки низ светот форсираа “супер лабава монетарна политика“ премногу долго, надевајќи се дека инфлацијата ќе биде минлива, додава Субараман. “Сега владите треба да ја воспостават контролата врз наративот за инфлацијата. Уште една работа што сакам да ја истакнам е дека кога имате голем број на економии што слабеат, не може да се потпирате на извозот за да креирате раст. Тоа е уште една причина поради која веруваме дека овој ризик од рецесија е многу реален и веројатно ќе се оствари.“

Во Nomura сметаат дека доколку не се затегнат монетарните политики за да се симне инфлацијата сега, болката за економиите од влегување во инфлациски режим и заглавување таму, ќе биде далеку поголема.

Тоа ќе доведе до спирално покачување на платите и цените, што ќе биде уште помачно за економиите и за просечниот човек на долг рок, додава Субараман.

„Тешко е ова да се каже на фин начин… да се извади таа болка сега и да се симне инфлацијата е подобро за светската економија одошто да се остави инфлацијата да се оттргне од контрола, како што научивме во 1970-те.“