Струјата за домаќинства со иста цена до крајот на годинава

До крајот на годинава нема да се менува цената на електричната енергија, а сега е многу рано да предвидиме што ќе се случува после тоа, порачаа денеска премиерот Зоран Заев и претседателот на Регулаторната комисија за енергетика и водни услуги (РКЕ),  Марко Бислимоски.

До крајот на годинава нема да се менува цената на електричната енергија, а сега е многу рано да предвидиме што ќе се случува после тоа, порачаа денеска премиерот Зоран Заев и претседателот на Регулаторната комисија за енергетика и водни услуги (РКЕ),  Марко Бислимоски.

Премиерот Заев посочи дека стабилноста на цената на електричната енергија за домаќинствата е гарантирана до крајот на годината преку ЕСМ и МЕПСО, а со тоа и преку државата и додаде дека нема никакви причини за стравување.

„Верувам дека сите наши искуства и експерти кои ги имаме од МЕПСО и ЕСМ, РКЕ и сите независни експерти ќе ни се најдат за да изградиме мудри политики во интерес на граѓаните. Во периодот што претстои ќе ги искористиме сите потенцијали што ги имаме во РЕК Битола и во РЕК Осломеј. Веќе објавивме постапка за набавка на јаглен од странство за производство на електрична енергија што ќе се произведува по три до четири пати помала цена од берзанската која ја има во моментов. Сето тоа ќе значи стабилност, прво за домаќинствата, а  потоа и за јавните институции и за приватниот сектор, рече Заев на денешната прес-конференција во Владата на која беше најавена големата германска инвестиција – ветерниот парк „Вирови“.

Тој нагласи дека на тој начин нашата држава постапува исто како државите во регионот и пошироко и додаде дека сме подготвени навремено да реагираме тогаш кога ќе треба и таму каде што ќе треба.

„Нашите експерти веќе размислуваат што ќе се прави по Нова година и никој не знае што ќе се случува тогаш. Голем дел од работите зависат од цената на природниот гас и овие денови треба да се соопштат деталите од стратегијата на ‘Газпром’, кој задоволува повеќе од една третина од европските потреби на природен гас. Ние сме дел од глобалниот пазар и ќе ги следиме внимателно и будно сите случувања на меѓународните берзи на енергенси и со сите свои расположливи капацитети ќе гледаме нашите граѓани и нашата економија да ја донесеме во предност пред другите економии. Не би избрзувал да кажам што би направиле, но можам да потврдам дека сме тука за да им се најдеме и на граѓаните и на државата“, рече Заев и посочи дека граѓаните нема да бидат оставени да се вклучат на слободниот пазар на електрична енергија.

На прашањето дали земјава планира да набави интервентни резерви на природен гас, премиерот Заев одговори дека тие се букираат квартално, полугодишно и годишно од трговците со гас, а не од државата. Тој нагласи треба да се внимава со психолошкиот момент кој може да предизвика спирала во инфлацијата и додаде дека државата има институционални, финансиски и материјални капацитети да интервенира и да помогне.

„Инфлацијата сега е некаде од 2,7 до 2,8%, а цената на струјата има удел од 5,6 % во производната цена на производите. Некогаш знаеме да го наметнеме силно психолошкиот момент кој сам по себе може да предизвика спирала на покачување на цените. Тоа не ни е потребно. Стабилноста и подготвеноста навремено да реагираме е многу важна за да не предизвикаме дополнително психолошки ефекти врз цените. Има комплетна стабилност на денарот, фискалните политики се комплетно подготвени, досега е реализиран 65% од дефицитот, а 35-те проценти што остануваат и непродуктивните трошења се сериозен капацитет од 50 до 150 милиони евра за субвенционирање на граѓаните и фирмите доколку е потребно. Не верувам дека ќе треба ни десет отсто од тие пари, но времето ќе покаже“, потенцира Заев.

Според претседателот на РКЕ, во моментот кога ќе се зголеми испораката на природен гас од Русија ќе се стабилизира цената на гасот, а со тоа и цената на електричната енергија.

„Едно е сигурно дека нема да има никакви промени на цената на електричната енергија до крајот на годинава. Во овој момент ЕСМ во соработка со Владата преземе активности да се набави јаглен со цел да се стабилизира цената на електричната енергија во државата пред се за стопанството. Премногу е рано сега да зборуваме што ќе биде од 1 јануари затоа што работите се менуваат како на филмска лента. Поконкретни информации ќе имаме во текот на декември кога МЕПСО и ЕСМ ќе ги распишат своите тендери за набавка на загуби на електрична енергија“, рече Бислимоски.

Тој нагласи дека верува оти ЕСМ, како и досега и понатаму ќе обезбедува повеќе електрична енергија отколку што е предвидено со Законот за енергетика за потребите на домаќинствата и истакна дека во текот на минатата недела по најавата на рускиот претседател Путин дека ќе ја зголеми испораката на природен гас преку Украина во Европа, цената на електричната енергија на берзата во ХУПЕКС се намали за околу 20 проценти.

„Во сите земји во Европа постои проблем со цената на електричната енергија и на природниот гас, но не и со испорака на струја. Електрична енергија има, но по многу повисоки цени. Во наредниот период може да се очекува дека одредени земји пред се’ своето производство ќе го користат за домашни цели, но повторно ќе има и трансакции на пазарот на електрична енергија“, потенцира Бислимоски.