Трагедија во Бугарија: во запален автобус загинаа 46 македонски државјани

Според неофицијалните информации, се работи за претежно млади луѓе коишто се враќале од екскурзија во Истанбул.

Четириесет и шест патници утрово настрадаа во страшна сообраќајна несреќа која се случи на автопат во Бугарија, на триесетина километри од Софија, кога автобус со македонски таблички во кој се превезувале 53, најверојатно, македонски државјани излетал од автопатот и се запалил. Меѓу жртвите се 12 деца и двајца близнаци. Возачот исто така е меѓу жртвите. Седум патници се преживеани и во тешка состојвба со сериозни изгореници се пренесени во болницата „Пирогов“ во Софија. Најмладиот преживеан има само 15 години.

„Сликата е ужасна и не секој може да ја поднесе. Никогаш не сум видел вакво нешто. Тешко е да се одреди колку луѓе има и кои се“, изјави бугарскиот министер за внатрешни работи Бојко Рашков кој дојде на местото на несреќата заедно со бугарскиот премиер Стефан Јанев.

Трагедијата се случила околу 3 часот наутро кај селото Бошнек на автопатот Струма меѓу Перник и Дупница, на 31 километар југозападно од Софија.

Според првичните инфромации, автобусот бил дел од група од четири автобуси кои неколку часа претходно влегле во Бугарија од Турција преку граничниот премин „Капитан Андреево“. Според неофицијалните информации, се работи за претежно млади луѓе коишто се враќале од екскурзија во Истанбул и требало да влезат во Македонија преку граничниот премин „Ѓуешево – Деве Баир“ кај Крива Паланка.

„Веројатно се работи за техничка неисправност, пред тоа има дупната гума“, изјави за БТВ Николај Николов, началник на Генералната дирекција за противпожарна безбедност и заштита на населението при МВР.

Бугарскиот претседател Румен Радев и привремениот премиер Стефан Јанев телефонски разговарале со македонскиот премиер Зоран Заев, кој веднаш заедно со министерот за здравство Венко Филипче и со шефот на дипломатијата Бујар Османи заминаа за Бугарија.