Трите најголеми банки со речиси 100 милиони евра вкупна добивка во првите девет месеци – за 23% поголема од лани

Стопанска банка – Скопје и НЛБ Банка имаат речиси идентична нето добивка за првите три квартали, од 33,5 и 33,2 милиони евра респективно, додека Комерцијална банка има добивка од 30 милиони евра.

Трите најголеми банки на македонскиот финансиски пазар оствариле заедно вкупно чиста добивка од речиси 97 милиони евра во првите девет месеци годинава, покажуваат нивните финансиски биланси доставени до Македонската берза. Оваа сума е за 23% поголема во однос на истиот период лани.

Стопанска банка – Скопје и НЛБ Банка имаат речиси идентична нето добивка за првите три квартали, од 33,5 и 33,2 милиони евра респективно, додека Комерцијална банка има добивка од 30 милиони евра. Најголем пораст на добивката има Комерцијална банка, од 36,6%, пред НЛБ Банка со пораст од 21% и Стопанска банка со поголема добивка за 13,7%.

Кај основните приходи на банките, она од што тие заработуваат, ситуацијава е следна: Стопанска банка има најголеми нето приходи од камати во износ од речиси 50 милиони евра, повисоки за 7% и нето приходи од провизии и надоместоци од 10,8 милиони евра, повисоки за 5,2%. Нето приходите од курсни разлики се 1,97 милиони евра, додека останатите приходи од дејноста се 8,35 милиони евра, повисоки за 58%.

НЛБ банка има раст на приходите од камати за 4,7%, на 37,8 милиони евра. Кај приходите од провизии и надоместоци, приходите изнесуваат 15 милиони евра, при што нивниот раст е 4,55%. Нето приходите од курсните разлики се 4,6 милиони евра, или пораст од 60%. Останатите приходи од дејноста се 4,6 милиони евра, овие три квартали помали за 55%.

Комерцијална банка има нето приходи од камати во износ од 34,5 милиони евра (пораст од 16,5%) и нето приходи од провизии и надоместоци од 12,7 милиони евра (пораст од 4,5%). Од курсни разлики банката заработила 3,7 милиони евра, што е за речиси 70% повеќе во однос на лани. Останатите приходи од дејноста изнесуваат 12,4 милиони евра, речиси на идентично ниво како во 2021.