Фабриката на Фолксваген во Волфсбург произведува најмалку возила од 1958 досега

Фабриката во Волфсбург, којашто ги произведува моделите Голф, Туран, Тигуан и Сеат Тарако произвела само 300.000 автомобили досега годинава, поради недостигот на чипови и други репроматеријали.

Фолксваген групацијата (Volkswagen Group) произвела само 300.000 автомобили во својата клучна фабрика во Волфсбург, Германија, досега годинава, пишува Ројтерс повикувајќи се на добро упатен извор во проблематиката. Ова е најниската бројка на произведени возила од 1958 година наваму и далеку зад просечните количини што излегувале од производната лента пред пандемијата.

Фабриката во Волфсбург, којашто ги произведува моделите Голф, Туран, Тигуан и Сеат Тарако, произведувала во просек околу 780.000 возила годишно изминатава деценија, а компанијата во 2018 година најави дека сака да ја достигне бројката од еден милион нови возила годишно.

Но, проблеми во синџирите на набавка на делови и репроматеријали предизвикаа производството да биде нешто под 500.000 возила во 2020 година. За оваа година, очигледно дека бројките ќе бидат уште полоши, пред сe’ поради кризата во набавката на микрочипови.

Фолксваген уште претходно најави дека ќе има кусок на нови произведени возила што ќе се мери со стотици илјади поради недостигот на чипови, проблем којшто ги погоди сите производители на автомобили низ светот, а се очекува да трае и во 2022 година.

Портпаролот на компанијата минатата недела рече дека се дискутира околу конкурентноста на фабриката во Волсфбург, којашто се’ уште не произведува целосно електрични возила, додека конкуренцијата во светот во оваа област станува се’ поостра.

Шефот на групацијата Херберт Дајс рекол на состанокот на надзорниот одбор во септември, дека доцнењето во транзицијата кон електрични возила би можело да го чинат Фолксваген загуба на 30.000 работни места, или четвртина од моменталната бројка на вработени.