Фудбалот нема да го промени  Катар, ама Катар сигурно ќе го промени фудбалот

Досега најконтроверзното Светско првенство  во фудбал почна деновиве во Катар. Малата, но пребогата држава од Персискиот залив потроши многу пари да го добие (за ова се апсеа и функционери на ФИФА) и организира најдобриот Мундијал досега, како што претендира. Но, уште неистркалана  топката на првиот меч, бучавата околу тоа дали токму на Катар воопшто требало да му се даде организацијата  ја достигна својата кулминација. Загинати работници при градење на стадионите, репресивен шеријатски систем, кршење на човекови права… листата на поплаки за кредибилитетот на Катар да е домаќин на планетарен настан што промовира сосема други вредности, нема крај. И како капак на се’, домаќинот забрани точење на пиво на стадионите, на само два дена пред почетокот на првенството, иако претходно се беше согласил. Преседан! Фудбал без пиво е како риба без вода, велат разочараните навивачи. Како и да е, фудбалот тешко дека ќе го промени Катар, но дека после Катар фудбалот нема повеќе да биде ист, тоа е сигурно.